【果欄中的江湖大嫂】陳煒冇桃花賴黃光亮? 拎住榴槤答好重殺氣

撰文:賴家杰
出版:更新:

無線劇集《果欄中的江湖大嫂》今個星期將會踏入結局篇,演員捉緊最後宣傳,出席名為「果欄終極任務」嘅宣傳活動,除咗喺現場同大家玩遊戲之外,歌手譚嘉儀更喺現場唱出劇集主題曲。今日出席演員包括:陳煒、黃光亮、馮盈盈、江嘉敏等。

現場演員都大派水果(陳順禎攝)

今次黃光亮有靚女拍擋陳煒陪住當然唔捨得啦,但煒哥講到︰「冇得唔捨得㗎,好難得㗎,佢每次拍完都話唔再拍啦,但一反應好呢佢就話下次再合作。」煒哥就透露自己日日都要工作,其實感情方面就好難識到男仔,不過黃光亮喺身邊就搶答︰「識咗我仲唔夠呀,想死呀。」煒哥無奈表示已經被霸住。

煒哥因咩事做訪問要拎住榴槤?(陳順禎攝)

同場江嘉敏都在場,今次佢嘅「鄰家女孩」形象深受歡迎,但對於佢自己嚟講,呢個形象用三個字嚟形容:「呃到人」,喺劇中飾演煮嘢食好叻又聽話,對於聽話就唔否認嘅,不過煮嘢食嚟講江嘉敏就話自己洗碗叻啲。作為女仔總要識整幾味嚟冧另一半,江嘉敏就話自己整甜品就幾叻,問到咁當初男友覺得佢整嘅甜品點評分,佢就答︰「佢實話好食㗎,你試下話唔好食吖!」

江嘉敏呢個笑容俘虜唔小宅男嘅心(陳順禎攝)

身為新一代女神又有「鄰家女孩」感覺嘅江嘉敏,感情狀況當然受到大家關注,Kaman直言多咗粉絲係真,但追求者反而冇乜,可能自己本身男仔頭性格。咁睇嚟各位男士要多多努力,大家仲有機會。