大S徐熙媛親証懷有第3胎　上月癲癇復發健康狀況成疑

做媽媽真係一啲都唔容易，生BB就好似到鬼門關走一圈，上個月忽然傳出大S徐熙媛，癲癇復發暈倒需要送院留醫，有指因為大S誕下第2胎時注射過量麻醉藥減低生仔痛楚導致癲癇，至上個月感冒未癒再次引起癲癇復發，同時亦傳出佢懷孕嘅消息，呢日大S回應台灣傳媒查詢時親認：「還沒滿3個月啊！」汪家年底又添新成員啦。

自2010年結婚後，大S同汪小菲先後誕下一對仔女湊成好字，去年6月大S出席丈夫台灣酒店開幕時曾經講過，為咗身體健康唔會再生BB，仲同汪小菲傾過要做結紮手術，估唔到話口未完又有咗啦。大S回覆傳媒查詢時親証懷孕7周，推算落嚟BB年尾會出世，不過似乎佢自己都有啲擔心，因為上一胎癲癇被送至加護病房，加上已經41歲屬高齡產婦，真係要事事小心呀。