【百萬富翁】勇者仁傑同歌莉來自咩動畫？　有個選擇笑死現場觀眾

雖然曾經創下39點收視嘅《百萬富翁》隨住亞視翻生再度喺觀眾面前出現，但唔知係唔係因為冇咗大氣電波嘅助力，定係因為大家唔慣主持嘅由陳啟泰轉咗做陳志雲，所以個勢真係同以前爭好遠。可能正正係因為咁，成個節目好似玩得放過以前，啲題目仲隨時笑爆咀。最近就有網友剪輯咗《百萬富翁2018》第17集其中一個參賽者嘅作答片段出嚟，而呢條問題係一條$3000嘅題目：「『勇者仁傑與歌莉』是來自哪一套動畫？」

志雲大師就喺片段裡面向參賽者逐一講出四個選擇，有唔少現場觀眾聽到第一個選擇「A：嚦咕嚦咕魔法陣」時已經笑咗出聲，到大師講完「B：咕嚕咕嚕魔法陣」同「C：撲通撲通魔法陣」後，佢就講咗一個令好多人都會笑到失禁嘅選擇出嚟：「D：二姑二姑魔法陣」，搞到現場觀眾都笑得勁大聲，而我自己聽完呢個選擇後都真係笑到痴咗線，好彩個參賽者都真係「臨危不亂」，講出「B」先係正確答案。唔明有幾好笑？我唔會喺度解釋，建議問問你身邊啲男性朋友。

其實第30集裡面都有一條問題好正，而呢條問題會挑起一部分球迷嘅神經：「以下哪球隊未獲得過『英格蘭超級足球聯賽』冠軍？」而陳志雲就提供咗四個選擇畀個參賽者「A：阿仙奴」、「B：利物浦」、「C：布力般流浪」同「D：曼聯」。唔知係個參賽者唔熟足球定點，佢要用「五十五十」呢個錦囊剔走兩個唔關事嘅選擇，最後得返「B：利物浦」同「D：曼聯」呢兩個答案畀佢揀，而結果真係呼之欲出，亦明顯係喺「利迷」內心嘅傷口上灑鹽。

但幾搞笑都好，都唔會夠陳芷菁同已故影星鄧光榮好多年前上《名人慈善百萬Show》咁經典。當時主持陳啟泰就問佢哋兩個「以下哪部不是莎士比亞四大悲劇之一？」，而陳芷菁就好肯定「B：奧賽羅」唔係，仲講咗一句「我讀、我讀Drama架」，之後又同鄧光榮擊哂掌咁。到陳啟泰揭曉答案係「D：羅密歐與茱麗葉」冒，陳芷菁就嚇到擘大個口得個窿，勁驚訝咁問：「吓！點解呀？」而陳啟泰未喺對方定神時就已經講「八千大元！畀啲掌聲！」