谷阿莫玩抖音變裝長髮「美」女　網民笑罵「妖艷賤貨」

內地音樂社交平台抖音，短短年半間在中國爆紅，這是一個以年輕人為主嘅15秒音樂短片軟件，用戶可以通過呢款軟體選擇歌曲，拍攝15秒嘅音樂短片。大家間中都會喺Facebook見到好多人Share抖音啲短片合輯，唔少名人都有玩，包括Angelababy、鹿晗、迪麗熱巴、陳喬恩同鄧超等。

抖音上成日出現唔同系列嘅短片，其中以「Karma is a bitch」為背景音樂嘅化妝短片最受歡迎。拍片者前一秒素顏似大媽，下一秒就變女神，驚嚇程度爆燈。網絡紅人谷阿莫都有玩埋一份，佢日前喺Facebook上載短片，前一秒係谷阿莫，下一秒就變裝大眼長髮「美」女，仲擺出嬌媚嘅表情。不過佢最後一秒用返谷阿莫聲線講：「我是谷阿莫！」反差極大。睇返谷阿莫個妝好似over咗少少，連佢自己都話好似變咗人妖，而佢經常喺啲片度鬧人「妖艷賤貨」，今次就畀網友笑返佢就係「妖艷賤貨」。