黃智雯全靠監製潘嘉德提攜 眼濕濕細說恩師知遇之恩
撰文：關穎賢
出版：更新：
《三個女人一個因》終於播出大結局，一班演員就約埋一齊食飯睇劇。今次黃智雯膽正飾演人格分裂嘅角色，成功得到觀眾嘅認同，更有大批網民話要捧佢做視后。
黃智雯接受《香港01》訪問時，指劇集橫跨了9個星期，大家每個星期都會同台前幕後一齊睇劇，加上收到好多觀眾嘅訊息分享關於遇到情緒問題嘅經歷，所以覺得特別感觸，眼濕濕謂：「除咗劇中有好多有娛樂性嘅場面之外，都能夠打動到人嘅心靈，呢個係作為一個演員、編劇、監製，最想得到嘅結果。
智雯講起大結局就眼濕濕（梁碧玲攝）
談到監製潘嘉德由《搜下留情》開始一直都找來黃智雯演出，直到德哥離開無綫最後一套劇就由智雯擔正，她直言一開始壓力好大，因為需要一人分飾三角，亦事前心理準備會係演藝事業中其中一個最大嘅挑戰。智雯續指《三個女人一個因》對自己別具意義，同時都好想親口多謝德哥對自己嘅信任同信心，坦言：「德哥今年會離開公司，喺我嘅演藝生涯入面可以參與到德哥咁多劇，有啲好經典嘅角色都係由佢創造出嚟，甚至乎令到大家認識我嘅角色鵪鶉妹，都係德哥一手提攜！佢係我黃智雯演藝生涯一個好重要嘅人，已經超越咗伯樂，係我半個屋企人，佢唔止喺工作上幫我，我私底下有好多嘅問題都會同我傾。我會叫佢老豆，因為個關係係親密到好似家人！」
台前幕後約埋一齊睇大結局（梁碧玲攝）
黃智雯同孫慧雪同樣以藍白look示人襯到絕（梁碧玲攝）