碧咸戴米奇頭箍賣萌　童心未泯孖仔女遊主題樂園勁貪玩

網上成日睇到好多片段，警告世界切勿獨留兒童與爸爸單獨一齊，小朋友分分鐘會成為阿爸玩物令人哭笑不得。湊BB可能媽媽叻啲，但陪小朋友放電就應該係爸爸強項啦。碧咸（David Beckham）與Victoria婚後育有三子一女，爸爸不時抽空陪佢地周圍去，呢日殺入主題樂園，不過睇相似乎碧咸先係玩得最開心嗰個噃。

男人永遠係大唔透嘅生物，無論幾多歲都要玩玩具，差在D玩具係模型定係實物。廿四孝爸爸碧咸最近同老婆Victoria，帶埋小朋友一家大細去主題樂園。睇完佢地分享嘅相片，不禁問句：到底係小朋友想去定碧咸自己想去呢？事關戴老鼠頭箍扮可愛嘅係碧咸，玩機動遊戲High到舉晒手嘅又係碧咸。

Victoria IG仲有一段跟喺碧咸身後一齊行嘅片段，行行下叫聲：「David﹗」戴住太陽眼鏡嘅萬人迷擰轉頭望老婆，依舊靚仔之餘，配上超可愛米老鼠頭飾以及充滿童真嘅笑容，到底邊個玩得最開心睇嚟真係呼至欲出啦。