開《喜劇之王2018》遭周星馳質疑抄襲 李力持願道歉兼改戲名

撰文:陳栢宇
出版:更新:

曾經執導《喜劇之王》、《少林足球》等周星馳經典演出嘅李力持,最近就計劃開拍新片《喜劇之王2018》,不過日前就收到周星馳旗下「星輝海外有限公司」發出嘅律師信,質疑《喜劇之王2018》係咪侵犯咗著作權。而李力持就喺社交網站度話自己冇抄襲,個故事亦都係全新嘅,願意道歉同修改:「只是創作的靈感像當年我和周星馳一起創造《喜劇之王》電影的靈感一樣,來自於拍攝時劇組發生的真實勵志趣事改編。」

李力持最近收到周星馳旗下公司發出律師信,話佢想開拍嘅《喜劇之王2018》有抄襲之嫌。(網上圖片)

李力持話《喜劇之王2018》呢個名只係申報嘅名,唔係想抽水:「如果你認為損害了你的權益,我願意道歉,也樂意修改。如果你願意,我們可以像以往一起創作《喜劇之王》電影時一樣,一起探討改什麼名字,這樣,即不侵犯你的權益,又可以延續我們對喜劇的情懷。」而李力持仲引用咗習近平喺新年賀詞講嘅其中一句「幸福是奮鬥出來的」,指自己同周星馳方面之前一直都係炮製啲合符國家要求嘅正能量勵志故事。

李力持話自己冇抄襲亦願意修改。(網上圖片)