【逆緣．專訪】陳家樂極窮被迫過隱青生活：冇錢到飯都唔敢食！
陳家樂喺無綫熱播劇集《逆緣》裡面飾演103歲冷凍人「鍾定國」，二次大戰時便被日軍雪喺實驗室，醒來之後至慢慢意識到自己身在2018年，並尋回兒子姜大衛同孫兒黎耀祥，其演技亦大獲好評。而事實上，陳家樂亦度過了一段頗長的自我放棄嘅「冷凍時期」，有6、7年都係浮浮沉沉咁，當中更有3年係完全冇嘢撈：「我一開始嘅時候都係打工仔，做保險、做打電話嘅Sales，唔知係咪因為喺出面被搓圓撳扁得多，搞到個人冇乜火冇乜脾氣。當時我係儲咗筆錢先參加《英皇新秀歌唱大賽》入行，開始時覺得筆錢都夠使，但冇諗過咁多年都搵唔到錢，搣咗四年就冇哂啲錢，嗰陣時真係想死，嗰時24、25歲。」
或者呢個已經唔係生活問題，而係生存嘅問題，所以陳家樂要周圍問身邊朋友借錢度日：「嗰時公司叫做墊支咁每個月畀500蚊我，如果我完全冇嘢做就係得呢500蚊，而呢500蚊真係好快就冇咗，所以成日叫朋友借少少畀我，到後尾啲朋友都覺得唔可以咁樣借錢畀我，係屋企人見到我咁樣，靜靜雞攝幾百蚊落我銀包度，我先過到最艱辛嘅日子。」
除咗開源，就係節流，陳家樂為咗減省支出，佢只能夠揀唔出街：「個人愈來愈摺，自己都唔知自己想點，一出街啲人又覺得我係明星、藝人，好似好風光咁，但其實我連妝頭買衫錢都冇，連飯都唔敢食，淨係敢食兩蚊個嘅包，我最難堪係啲人以為我好風光，所以我好多謝麥曦茵導演帶返我出嚟。」
除咗多謝有人肯再用他自己，陳家樂亦好多謝最近兩年認識嘅一班戰友：「以前真係覺得好孤獨，入行頭6、7年，香港電影真係幾淡市，好少人製作，我連Casting嘅機會都好少，好在呢幾年本土製作回歸。我哋呢班新血其實係有個共識，就係好想團結呢代電影人去一齊做事，好似我哋成班男仔上年幫方皓玟拍咗個MV，而呢個係一個開始嚟，之後我哋都係搞足球隊、一齊諗劇本，以前係冇呢樣嘢。今屆金像獎好多新演員上台做頒獎嘉賓，我自己都好開心。」
依家事業上揚緊，係咪解決到依家年青人面對緊嘅問題？陳家樂就話買樓上車對佢嚟講仲未係易事：「以前真係覺得冇乜可能，樓價實在太高，我計過一日只用300蚊先可以有希望，但我日日都要出街開工，同同事做嘢都要請佢哋食飯架，冇辦法唔應酬。有前輩就同我講，呢啲錢係要用，要當係投資，如果就咁擺喺度，你收入未必升到，而我咁做收入真係有提高到。」咁到底戲中同佢有感情線嘅林夏薇有冇面對過陳家樂嘅困難？下編再續。