【逆緣．專訪】林夏薇為學戲放棄拍《色，戒》：我冇後悔呢個決定
無綫劇《逆緣》裡面「香港隊長」陳家樂嘅戇直演出當然係一個亮點，但其實林夏薇扮日本妹都扮得幾好睇，而為咗演得似模似樣，本身唔識日文嘅佢仲兩星期內日練12個鐘，真係下咗唔少苦功。其實薇薇為咗演藝真係搏到盡，練學日文嚟講只係其中嘅一小部分，佢經歷過嘅辛酸絕對係好多人都唔想體驗。
相信好多人都覺得薇薇家境好，出身中央戲劇學院（中戲），係章子怡、劉燁、鄧超等巨星嘅師妹，又有林峯呢個堂大佬睇住，自然就可以平步青雲，事實上佢係一步一步咁用自己嘅汗水同淚水去到今時今日嘅位置，唔應該單憑出身就抹煞佢嘅努力。薇薇喺訪問中就話自己16歲隻身到北京讀書時「真係乜都唔係」：「我由細到大，屋企都係教我要靠自己，我自己一個喺北京時，我係住地下室，要靠做臨時演員搵錢，試過得30蚊人工都要畀中介呃，又試過拍幾日廣告得100蚊。」
係咪讀完中戲就一帆風順？薇薇好記得學校老師同佢講過，各位同學畢業後都係由零再開始：「其實中戲只係一個平台，令你接觸多咗啲相對安全嘅機會，因為有好多大導演會去中央戲劇學院搵演員。」咁讀書時有冇人搵過佢拍戲？佢就講咗件好少人知嘅事出嚟：「我讀大學時其實係有機會參與李安嘅《色，戒》，如果我拍，《色，戒》就係我第一套作品。不過，老師話我係一年級升二年級，唔可以出去拍戲，個角色係貫穿成套戲，同學校傾咗好耐都唔畀。老師就話如果要拍嘅就要退學，我有同學就覺得我應該退學，機會唔係次次有，但係我選擇咗腳踏實地，因為我冇信心第二年再考到入中戲。我覺得中戲係好神聖，我嘅初心係入嚟求學問，讀完之後再搵其他成就。我掙扎咗好耐，諗到底係我係為一個角色定係其他，最後我係揀咗繼續讀書。」而佢亦都冇後悔過呢個決定。
之後，薇薇就更清楚自己嘅目標，就係裝備好自己，做一個真心鍾意做戲嘅演員，而呢個諗法到今時今日都冇變過：「我同我同班同學陳曉仲有經常聯絡，佢覺得我返香港發展係啱，而佢喺北京都好拚博，遇到嘅困難都唔同，但都係向住同一個目標繼續進步。我拍緊《公公出宮》時，佢打畀我，問我想未來工作係點樣，問我想唔想有突破，仲建議話不如一齊放低所有嘢去跑龍套，我話都可以試下，點知我哋各自都好快結咗婚，變得有啲嘢冇辦法放低，但我哋都冇放棄過追求自己嘅夢想。」而佢亦都好記得學校老師呢句說話：「佢話做人做得好，你先會學識做戲。」
髮型提供：Ivan Lee @ Headquarters（林夏薇）
化妝提供：江中平化妝室（林夏薇）
服飾提供：GU Hong Kong（陳家樂）