陸永囡囡原來係貓奴　媽媽無眼睇：出門口喊到好似畀人虐待咁

香港有唔少愛動物之人，無論養貓養狗定係兔仔倉鼠，都將寵物當成一家人一樣，有小朋友嘅家庭更加可以從小培養佢地嘅愛心同責任心。陸永同太太Reina生咗兩個可愛嘅囡囡Hannah同Simsim，家教相當好，細細個就自己坐定定食飯，最近屋企多咗兩個新成員，Reina居然留言話：「今日出門口，阿sim喊到好似畀人虐待咁……」到底發生咩事？

回帶去返兩日前，原來Reina帶囡囡到朋友家中探訪，收養咗兩隻貓：「帶Hannah去朋友屋企睇貓貓，朋友畀兩隻貓貓佢帶返屋企。其實佢想帶曬人哋屋企二三十隻貓貓返嚟……」小朋友見到貓仔狗仔通常都好興奮，玩完一輪要幫手照顧起居飲食時，又會推三推四，不過呢個情況就無發生喺Hannah同Simsim身上。

Reina呢日又上載兩張相，Simsim瞓咗喺檯底同兩隻貓玩，睇嚟佢哋同小主人已經建立起感情，就咁睇相冇咩嘢，不過Reina就留言道出真相：「今日出門口，啊sim喊到好似畀人虐待咁，佢話今日工人姐姐放曬假，擔心bb冇人照顧……返到屋企佢話佢好忙，貓bb成日黐住佢，佢要陪貓bb。」估唔到Simsim四歲人仔已經咁有責任心，Reina仲加上Hashtag話：「兩隻貓b真係淨係黐啊sim一個，佢哋三隻嘢喺枱底纏綿咗半個鐘。」睇嚟以後陸永一家要出門都幾難啦。