劉玉翠感謝做新人時張艾嘉給予尊重：畀好大空間我自由發揮
撰文：陳栢宇
出版：更新：
劉玉翠喺奇妙電視節目《拾回感動》繼續發掘香港嘅好人好事，最新一集裡面佢就到訪一間聘請聽障人士嘅咖啡店，感受佢哋故事之餘，仲親身體驗共融的工作環境，跟店員學沖咖啡。劉玉翠就向弱聽咖啡師Zita拜師學沖咖啡，經過一番指導同嘗試，劉玉翠成功沖出人生中第一杯拉花咖啡，而佢亦表示整個過程裡面都能夠感覺到Zita嘅用心同專業，每個步驟都詳細解釋，並不亞於健聽人士。
劉玉翠形容咖啡店老闆娘（左）是現實中的女俠，創造出一個難能可貴的工作環境。
喺節目結尾，劉玉翠亦都分享咗一位令佢感動至深嘅人物，而呢位人物就係剛剛喺金像獎中奪得最佳編劇嘅張艾嘉。劉玉翠參與嘅第一部電影係《廟街皇后》，而當年佢嘅對手就係已係國際級演員嘅張艾嘉，但相反佢只係一個冇知名度嘅演藝學院學生。劉玉翠笑言張姐冇向佢傳授任何做戲技巧，但正因如此，佢感覺到獲得尊重：「佢畀好大空間我自由發揮，想點演就點演，其實好大包容性。佢好有胸襟，好肯畀新人盡情發揮潛能，如果畀意見，我會不知不覺迎合佢，做咗佢想要嘅野，但就唔係我自己。」
節目結尾，劉玉翠就話張艾嘉好令佢感動，因為第一次拍戲時，對方就好肯畀機會佢自己發揮。