【早霸王】森美選睇戲十大最無癮行為? 食薯片原來唔算黑人憎

撰文:鄺鈺瑩
出版:更新:
小儀話自己遇過有觀眾外賣飯盒入場,亦試過同朋友睇首映時,將整袋爆谷倒到前排觀眾身上……(資料圖片)

袁偉豪早前與「行內人」發生的小插曲,隨即引起唔少網民討論在戲院最怕遇到的事情,而森美、小儀今日亦在其主持的《早霸王》內,列出「去戲院令你好無癮的事」的事項,當中包括:開場前廁所大排長龍、唔記得帶3D眼鏡,又要、發現戲飛越嚟越貴、焗住坐第一二排、冷氣太大,凍到專心唔到、附近有人即場討論劇情、同場有失控嘅小朋友、有人食好香嘅嘢、坐側邊嘅人成日出出入入、俾後面踢櫈、有人食爆谷食得好大聲、兩個扶手被人佔據、細細聲傾電話、有病友不斷咳、情侶喺你前面親熱。
 

森美話自己可以接受場內討論情劇、進食濃味食物,佢都幾忍得喎。

結果踢櫈、失控嘅小朋友以及討論劇情成為網友心中最無癮之首,對於踢櫈呢個行為,高人一等嘅森美就話有啲戲院嘅坐位較窄,好多時要翹腳先可以坐得晒,翹得耐又要換吓姿勢,結果就係唔小心踢到前排觀眾,雖然森美講到情有可原咁,但睇睇吓被人踢一腳真係非常令人不爽。至於討論劇情甚至係劇透,相信唔少人都會遇過,其實想傾計,大可以返屋企或者去茶餐廳,但偏偏唔少情侶、夫婦都好喜歡將呢種行為留在戲院內進行!有網民留言表示都遇過以上情況,跟對方反映後得到「戲院有話唔俾人講嘢咩?」的回應,野人的行為完全令人無語。

袁偉豪的「薯片事件」引來大眾討論。(資料圖片)

而票選第一的「同場有失控嘅小朋友」,相信同《復仇者聯盟3:無限之戰》不無關係,森美更笑言有朋友帶囝囝入場,一心睇Iron Man,結果係一開場,小朋友就已經因為太驚嗌走人,他認為小朋友失控又或者係咁發問,要怪就只能怪父母。雖然「有人食好香嘅嘢」未有打入三大無癮之列,但小儀就話曾遇過有觀眾外賣黑椒豬扒飯入場,森美表示依家戲院增加唔少熱食,咖哩魚旦絕對係濃味之首。

唔少網民都認為睇得卡通就預有小朋友會問長問短。(資料圖片)
近年戲院的座位行距變得較為闊,不過依然有唔少觀眾坐唔停,不停換坐置而踢到前排觀眾。(資料圖片)