吳卓林認成龍係老竇引英美日媒報道 外國網友:好心你就自己搵工

撰文:陳栢宇
出版:更新:

18歲嘅「小龍女」吳卓林同母親吳綺莉嘅關係真係時好時壞,最近又唔知做乜跌到落谷底,其中一早離家出走嘅卓林就同30歲外藉女友Andi飛去咗加拿大,仲拍咗條「尋父」片認自係成龍個女,希望關心佢嘅人知道佢依家發生緊咩事,佢喺片裡面就用英文講以下呢番話:「我哋已經搵過警察,去過醫院、食物銀行、LGBTQ庇護中心、全部都唔理我哋。」

吳卓林之前拍片認成龍係老竇,仲話自己喺加拿大孤立無援。(網上圖片)

片段一出之後,除咗香港嘅傳媒廣泛報道,連外國嘅傳媒都好注意件事,當中就包括美國嘅《People》、英國嘅《每日郵報》、《太陽報》同日本嘅《日刊體育報》,呢次卓林真係可以話係「威」出國際。《每日郵報》就以話卓林係因為有「恐同家長」而要住天橋底,而《People》就重提返卓林3年前喺一個訪問裡面話自己唔當成龍係老竇。普遍網友就唔撐卓林嘅,當中有好多人就叫佢同女友都認認真真搵份工做,亦有人直指佢哋兩個係利用緊成龍嘅名氣。

英國《每日郵報》就以卓林因有恐同家長而要住天橋底為題去報道件事。(網上圖片)