【流行經典50年】森美唱《聽海》勁好聽 單飛出過歌你又記得嗎？
撰文：洪曉璇
出版：更新：
森美係電台主持出身，之後再到電影圈、電視圈，主持拍劇樣樣皆精，聲靚就無容置疑啦，但佢嘅歌喉大家又聽過未？呢日森美去到《流行經典50年》，今次唔係做主持而係嘉賓，獻唱張惠妹嘅經典金曲《聽海》，網友驚嘆原來森美原來咁唱得，歌影視都俾你玩曬啦森美大哥﹗
森美拎起支咪，唔主持轉行唱歌一樣咁正﹗（影片截圖）
《流行經典50年》有個環節「我不是歌手」，故名思義搵來一啲非歌手藝人踏上舞台一展歌喉，之前請過黑仔姜皓文，仲有康華獻唱，好歌喉都令觀眾相當驚喜。新一集有經常亮相TVB嘅森美。做得DJ聲就一定靚架啦，但原來佢仲好唱得，呢次揀選張惠妹嘅經典金曲《聽海》，雖然唔係好習慣佢一本正經嘅樣，但真係聽出耳油。
唔少網友留言話：「把聲好正仲好有感情」、「有專業水準」，森美嘅投入表情亦非常吸晴：「個肉緊樣好似樊少皇﹗」望落又真係有點似噃。睇開電視嘅朋友可能對森美嘅歌喉感到驚喜，不過有留意開嘅朋友就知，其實森美小儀歌劇團中佢都要KEEP住唱歌唱足十年，仲曾經喺2007年同細蘇、LEO、陳強組成「森美移動」出過歌。2013年仲出過一隻福音歌《在這世界看不夠》，廣東話獻唱更有感情呀﹗