Gordon哥哥蕭徽勇瘦咗3個碼 究竟靠乜可以喺1個月內激減40磅?

撰文:關穎賢
出版:更新:

好多人都話減肥係女人嘅終身事業,但其實計我話減肥係所有人嘅終身事業。大家記唔記得蕭徽勇﹝Gordon﹞?佢做過DJ、配音、主持人等工作,但最為人熟悉就《放學ICU》嘅哥頓哥哥,之前喺劇集《實習天使》所演嘅智障角色再為觀眾所認識。不過最近Gordon就喺Big Big Channel開live表示挑戰蔬果汁斷食大挑戰,瘦咗好多,由直逼300磅減到200頭,雖然未變到瘦仔,但都由XXXL變到XXL,成績叫咗大躍進!

Gordon由直迫300磅成功減咗80磅啊!

Gordon接受《香港01》訪問時,透露自己減磅原因,事緣係去年5月因為身體出現問題而入醫院:「起初係因為胃痛,然後做身體檢查就發現高血壓,血糖指數都OK嘅,但係血壓上壓過咗200,係去到有機會中風同死唔死之間,所以要正視呢個問題而決定減磅。」一開始減肥就係隔日做gym,做重量同帶氧訓練,個幾月就減到十幾磅,不過Gordon就笑言自己本身都差唔多300磅,就算瘦咗十幾磅人哋睇落都冇乜分別,持續由去年7月開始到4月就減咗40磅,不過當身體習慣咗個模式就開始進入樽頸位,磅數就開始停滯不前,然後開始轉用另一個方法去減肥,就係蔬果汁斷食法。究竟有幾神奇,以下落嚟就教大家點整啦!

Gordon就公開蔬果汁斷食餐單,其實做法好減單,就係預備唔同配搭嘅蔬果,然後用榨汁機榨成果汁。

第1日嘅早餐就集中選用綠色蔬菜,例如西芹、青瓜、檸檬,再加適量嘅薑同歐芹。午餐就可以揀紅色蔬果,就好似蘿蔔同紅蘋果,如果下午茶覺得肚餓,就可以紅綠蔬果配搭,將蕃茄、橙加西芹同青瓜,再落適量薑同歐芹。而晚餐就簡單啲,苦瓜同梨就OK喇!

+5

其實第2日同第1日嘅飲用方法都差唔多,不過可以再揀選唔同嘅蔬果配搭,例如香蕉、蘋果、羽衣甘藍、菠菜咁,如此類推。唔好以為呢個蔬果汁好難飲,其實味道都唔錯,不過因為原理係等腸胃「放假」,所以有時都會覺得肚餓。如果大家返工覺得唔方便榨汁,可以選擇早餐喺屋企飲1次,放lunch嗰時可以去果汁店買五青汁飲,晚餐就返屋企榨汁,最緊要堅持!

+2

唔食嘢齋飲果汁減肥真係得?Gordon話畀大家知,真係得!其實呢個蔬果汁斷食法就係Juice Reboot,係Gordon一個之前喺澳洲電台前同事介紹嘅,源自澳洲一個叫Joe Cross嘅企業家。講到過程辛唔辛苦,Gordon話:「初頭都係抱住半信半疑,硬住頭皮嘅心態去試。第1日就冇咩嘅,因為身體入面都仲有食物可以消化,但係第2日就好難頂,時間過得好慢。其實係心理影響好大,感覺好失落,個人好似冇力咁,又唔夠飽。」Gordon直言去到第4同第5日就開始排毒同宿便,排完一身輕:「飲咗蔬果汁1個星期肚腩細咗80%,效果等於做咗8個月gym嘅磅數,真係好明顯喺短短29日就減咗40磅!」除咗減到肥,Gordon仲話改善到睡眠質素,連患咗10年嘅睡眠窒息症都改善埋,個人精神好咗,體力好咗,連皮膚都好咗啊!

真係同之前差好遠!