【棟仁的時光.專訪】黃長興9年前淡離幕前 開餐廳成事業轉捩點

撰文:林迅景
出版:更新:
「戇爸」真係好爸爸。(劇照)

《棟仁的時光》中,黃長興飾演好好先生張潮岸(戇爸),其中愛女兒愛家庭的形象都在觀眾心中留下深刻印象。現實中的黃長興其實與「戇爸」也有不少共通點。說起黃長興的演藝事業,其實真是一波三折,先是法國回流香港的他參選「香港先生」而入行,後來又因「細佬」黃長發與鞋王三奶的戀情爆光演藝生涯直插谷底。之後黃長興毅然決定另創一番事業,「為夢想」開設自己的法國餐廳。甚有生意頭腦的他更成功在首半年回本。

黃長興接手餐廳之後,頭一個月就即刻收支平衡。(視覺中國)

「嗰件事」之後,黃長興亦沒有因被TVB「雪藏」(雖然黃長興本人堅持並不是「雪藏」)而停頓下來,反而變相成了他轉戰餐飲事業的轉捩點。黃長興:「嗰時公司話要『靜一排』真係好大打擊,我心諗點可以停工作。咁咪唯有當放下假先囉。但係我靜咗一個星期左右,就同自己講:不如出面搵其他嘢做,因為要俾家用父母,要使費㗎嘛。」

【棟仁的時光.專訪】無悔細佬拖累事業 黃長興:一世人兩兄弟

【棟仁的時光】林子善35歲買兩層樓 除一人打3份工仲有乜秘技?

黃長興其實都係一個好叻嘅生意人。(黃國立攝)

同時間正好黃長興有機會頂手一間法國餐廳。「2009年籌備,2010年就開咗餐廳(A La Maison Restaurant & Bar)。嗰時因為原餐廳老闆唔做,所以我就頂咗嚟做。其實都只係改一改個廚房同裝修。(用咗幾錢?)大約50萬左右,因為我都係自己落手落腳塗油,上深圳買家俬,咁樣慳好多。(有冇賺?)因為我已經計過度過每日要做幾多個客做幾錢生意。頭一個月營業額已經有15萬,淨賺都差唔多10萬。」黃長興笑言,因為自己兼任廚師一職,自己又可以「慳多筆」。「不過新餐廳呢,永遠係頭3個月最好生意,哈哈。宜家就冇咁多啦,所以我哋差唔多係時候轉型。」其後生意越做越好,2016年更有投資者加入開設第2間於尖沙咀的新店(La Mer Restaurant & Lounge)。

2016年黃長興仲開埋第2間法國餐廳。(視覺中國)

黃長興生活穩定,又愛情與事業兼得。套用一句俗話,他真的是「上晒岸」。所以黃長興現在拍劇可算是兼職和為興趣?黃長興:「係㗎。調返轉講,我已經掛咗個名係一個celebrity chef(藝人廚師),即係star chef咁解。例如我會去活動煮下嘢食,好似謝霆鋒嘅style。我已經離開咗餐廳老闆,而希望喺國際地方上廚師課程,再升級下我嘅廚藝。」

黃長興講笑咁話,想做下一個謝霆鋒一樣嘅星級廚師。(視覺中國)

說回拍攝《棟仁的時光》和重回演藝圈的經過。黃長興表示好多謝珍姐(曾勵珍)。原來黃長興並沒有與TVB簽藝人約,不是親生仔,也不是簽約藝人。簡單來說,黃長興是屬於自由身。黃長興說:「珍姐話:『我哋個部門同management唔同嘅,一個角色啱嘅,就會搵個artist嚟拍。』我只係想聽到呢句說話,當然佢話宜家想簽返我嘅,梗係開心啦。因為有劇拍,再加埋公司栽培,『親生仔』嘅身份,我都開心。」

黃長興話好多謝珍姐同其他監制俾機會佢。(黃國立攝)

黃長興:「我14,15年都有拍劇嘅,但都係一啲戲份冇咁重嘅,都唔會影響太多我喺自己餐廳嘅時間。大家都知我好focus餐廳。2010年嘅時候我都推咗好多監制同導演嘅戲,其實我都唔應該咁做,做一個演員又點會推劇吖,係咪先?但係嗰時,我覺得呢間餐廳需要我多啲。到2015年尾,合約到期嘅時候就同珍姐傾過計。我同佢解釋之前係因為餐廳。珍姐(曾勵珍)知道之後就話得啦,『你想拍劇就嚟啦。』之後就好多嘅演出機會。」

珍姐句說話,即刻令佢放心晒。(黃國立攝)
+2