【普通話有限公司】MC Jin將任《中國新說唱》導師:係個挑戰!

撰文:賴家杰
出版:更新:

歐陽靖今午為奇妙電視節目《天下第一Friend 2》錄影,到底有冇準備節目上大爆秘密?MC Jin:「大爆呢樣嘢我覺得自然就最好,其實好話唔好聽,其實係要睇個節目同埋個主持人。」

今日節目錄影完之後,MC Jin就要返美國陪伴家人,因為佢平時工作都要飛嚟飛去,所以MC Jin就話依家其實都係用Facetime去維繫同兒子之間嘅感情:「真係好佩服上一代或者上上一代嘅人,因為以前嘅人係靠書信形式嚟聯繫,有時仲要等幾日先收到,所以真係覺得佢哋好厲害。」

MC Jin下個月生日,今日為節目《天下第一Friend 2》錄影時,主持人鄭紹康特意送上蛋糕預祝他36歲生日。(陳順禎攝)

節目錄影時,主持人鄭紹康安排咗生日蛋糕送畀MC Jin,因為6月4號就係佢嘅生日,而佢個仔就早佢3日,亦即係6月1日生日,唔怪得要趕返去美國啦!MC Jin話,今年生日正日都會同個仔一齊慶祝,轉眼間,佢個仔已經就快6歲,MC Jin直言自己都唔後生喇:「你唔好話佢咁快大個啦,我唔經唔覺都已經30+6啦,好快又就到40歲,我都係咁同人講我就快40歲,完全唔介意人哋講我年紀。」

除了年紀轉變,身份上都有另一個轉變,就係成為《中國新說唱》導師,但大家都知道,MC Jin嘅普通話水平就真係普通過普通,MC Jin都承認自己係「有限公司」:「講普通話真係一個挑戰,但其實能夠成為導師係開心事,可以將Rap傳承落去,我都會自己有限普通話講落去。」