【哈里王子大婚】新娘花球細節顯心思 一支香桃木跟足王室傳統

撰文:洪曉璇
出版:更新:
英國哈里王子與美國影星梅根於溫莎堡聖喬治禮拜堂舉行世紀婚禮。(視覺中國)
+3

呢個周末令全球聚焦嘅盛事,莫過於英國哈里王子與美國影星梅根(Meghan Markle)於溫莎堡聖喬治禮拜堂(St George's Chapel)舉行嘅世紀婚禮。婚禮每個細節包括婚紗、頭紗、花車、婚戒一一被外界審視,而梅根手上嘅花球,除咗用上同宋慧喬一樣嘅鈴蘭以外,原來仲大有來頭。

世紀一吻固然吸睛,梅根手上嘅花球原來亦大有來頭。(視覺中國)
梅根嘅花球以綠白色為主,比起傳統歐式花球屬細size手捧花。(視覺中國)

著名花藝師Philippa Craddock設計花球

婚禮上新娘除咗撓住老公,一對手最常掂住嘅就係花球,哈里王子同梅根嘅婚禮雖然有唔少癲覆皇室傳統嘅事物,不過喺花球呢一項上就跟足傳統。梅根嘅花球簡約而有層次感,由倫敦著名花藝師Philippa Craddock設計,以淺色真絲絲帶綁成,用上宋慧喬花球都有用嘅鈴蘭花、豌豆花、茉莉花等,仲有戴安娜王妃生前最愛嘅Forget me nots,除咗用作悼念戴妃,仲有一種花材係皇室婚禮必備。

原來英國皇室新娘,大多於花球中加入一枝Myrtle。(網上截圖)

喺英國皇室官方Twitter中講到,原來好多皇室新娘都選擇喺花球中,加入一枝代表愛情嘅香桃木(Myrtle),呢個傳統可以追溯至維多利亞女王,佢以一枝 香桃木為自己嘅花球作點綴,並於婚禮後將阿爾伯特親王祖母,送给俾佢嘅桃金娘灌木枝,種喺懷特島上奧斯本宮宅邸花園,至今已經170年歷史。從英女皇、戴安娜王妃到劍橋公爵夫人凱特,佢地嘅花球都跟足傳統加入一枝香桃木,梅根亦唔例外。

代表愛情嘅香桃木。(The Royal Family Twitter)
凱特同梅根嘅花球不約而同偏細,並跟足皇室傳統加入一枝Myrtle。(Getty Image)