【哈里王子大婚】英女皇青檸色外套超搶鏡 背後意思你又知唔知?

撰文:關穎賢
出版:更新:

哈里王子(Prince Harry)同梅根馬克爾(Meghan Markle)上周六(5月19日)完婚,日前(5月21日)肯辛頓宮(Kensington Palace)發佈了哈里王子同梅根嘅官方婚照。照片於肯辛頓宮內的綠色會客室(Green Drawing Room)內進行進行拍攝,更由流著波蘭皇室血統嘅攝影師Alexi Lubomirski操刀。相中見到所有人都大方端莊,衣服顏色都非常和諧,但無論梅根婚紗有幾靚,都唔及「事頭婆」英女皇青檸色套裝咁搶鏡!

梅根件婚紗輸咗畀英女皇嘅青檸色外套。(視覺中國)

咁究竟點解英女皇會著青檸色呢?英女皇一直都以單色系設計示人,今次嘅青檸色外套同紫色印花連身裙均出自皇室御用英國設計師Stewart Parvin手筆,再襯埋同色嘅Angela Kelly帽。其實喺紀錄片《The Queen at 90》入面,威塞克斯伯爵夫人(Countess of Wessex)解釋過,英女皇作為重要人物,當然每次現身都要令大家留意到佢蹤影,所挑選嘅衫必定要更加搶鏡。

英女皇青檸色套裝超搶鏡!(視覺中國)

至於點解挑選綠色系,全因綠色代表住成長同重生,喺重要嘅公開場合著綠色就代表尊重及對未來嘅希望。另外,今次嘅皇室婚禮都打破好多傳統,呢樣喺英女皇身上嘅紫色都睇得出。紫色代表咗清洗同對創意嘅熱情,充分代表咗英女皇嘅前衛思想,由顏色就睇到英女皇對新人嘅祝福,更加別具意義。