胡子彤自稱公司最型男生 同古天樂比即改口：老闆永遠第一
撰文：賴家杰
出版：更新：
胡子彤、吳肇軒、林家熙及胡卓希出席節目《今晚見》錄影。（陳順禎攝）
四名新晉小鮮肉，包括：胡子彤、吳肇軒、林家熙及胡卓希出席由曾華倩、朱慧敏和樂瞳主持的節目《今晚見》的錄影。身為眾人師兄的胡子彤開玩笑要哄一班姐姐開心：「講下工作上嘅計劃，咁三人當中我就同軒比較熟，所以會分享一下大家之間嘅故事岀嚟畀觀眾知道。」
兄弟班當然會有比較下邊靚仔同型仔啦，子彤就話靚仔唔敢當，型仔就絕對係佢：「我唔係走靚仔路線，但有型就絕對係全公司第一。」子彤咁講莫非佢覺得自己靚仔過老闆古天樂？子彤都立即嚇一嚇：「嘩.....咁講野嘅，呢段說話唔出得街，老闆永遠係第一。」
而胡子彤雖然早前喺女友歐鎧淳生日派對中，邀請咗薛凱琪做神秘嘉賓，但女友正日其實係月尾，歐鎧淳早幾日接受訪問時候都表示期待子彤會有一個不一樣嘅驚喜，但子彤透露其實未準備好：「禮物就當然買咗啦，但食飯地方就未準備，女友當然話求其食冇所謂啦，但你知道女孩子口裡說不...心裡面一定係想食好啦。」
胡子彤自稱兄弟班中自己係最型。（陳順禎攝）