陳潔靈感激肥媽葉麗儀助克服喪夫之痛　四個月後再踏紅館舞台

人稱「Miss Chan Chan」的樂壇殿堂級歌手陳潔靈接受電台節目《1圈圈 星光背後》時，在節目內談到在歌曲《星夜星塵》大賣時，及後更獲劉德華翻唱不少人都以為陳潔靈賺了不少版稅。但陳潔靈就直言當年談合約時出現問題故收不到任何版稅：「當時好多人都問過我有關版稅問題，賣完《星夜星塵》之後，呢首歌一定會出好多復刻版，但我都冇收過錢！但而家都冇所謂，因為我咁幸運得到咁好嘅歌！佢成就咗我嘅事業，奠定咗我喺廣東歌嘅地位。我曾經都覺得『點解會咁？』，但其實又有乜所謂？都唔介意喇。」

至於談到與老公的相識經過，陳潔靈自爆二人是透過肥媽介紹。認識個多月便決意拉埋天窗，謂：「我同張耀榮認識個幾月，佢就向我求婚。我啲朋友都跌哂眼鏡，原因係我之前有個拍咗十幾年拖嘅男朋友，都冇結婚。」更笑言有朋友以為自己跟演唱會之父張耀榮結婚，而風趣的耀榮叔每次見到陳潔靈都會叫她做「老婆」。提到09年面對丈夫因肺癌離世之痛，陳潔靈坦言過程傷痛，但學會如何處理人生必經階段。對於喪夫不久後便收到開紅館個唱的邀請，她強調感激肥媽及葉麗儀兩位姊妹幫自己跨越悲痛，勇敢站上紅館舞台唱出真感情：「當時好傷心，喊完又喊，可以點樣唱？但嗰時我就諗每個人都需要經歷生老病死，所以最後我就決定要做演唱會，亦將啲情感放喺演唱會裡面。我花咗四個月時間嘗試跨越悲傷，我係故意唱《把悲傷留給自己》。喺屋企我練歌，唱到喊唔出，所以我現場唱嗰就沒事。我很感激Maria同Frances，我同佢哋嘅感情係不可取替，嗰種感情，係經過音樂、大家人生不同階段去建立。」