衛詩雅拍廣告幫達哥洗頭 揀男朋友寧願光頭都唔要barcode

撰文:許育民
出版:更新:

上年一口氣上了多部電影的衛詩雅,人氣急升,不單時有品牌活動出席,最近仲有廣告拍。一向出名鍾意打機的詩雅,試過在社交網絡召集隊友一齊打機,又試以「如何打機不被母親發現?」出題向網友求救,引來熱烈討論。最近詩雅就有機會與「打機達人」 達哥一齊拍洗頭水廣告,詩雅當然不會放過向達哥取經的機會,達哥就同詩雅分享了打機心得和推介新遊戲。

詩雅為廣告扮演法官,都有幾分威嚴。

其中一幕講詩雅在廣告中幫達哥洗頭,特別炮製了波波頭,達哥就好滿意地回應:「好開心有專人幫我洗頭!」詩雅仲趁機約埋達哥一齊打機,單刀直入就問:「可唔可以carry(預埋一齊玩)我呀?」達哥今次真係洗濕個頭,想Say No都難,所以只好笑笑口回應:「梗係可以啦!」

拍洗頭水的指定動作,好有家英哥感覺︰「豈有此理!豈有此理!豈有此理!」

假如有日會變Barcode頭

這次詩雅扮演法官,以超長髮示人。講到頭髮,被問到寧願揀個光頭的,還是「barcode頭」的做男朋友,詩雅二話不說:「我揀光頭,因為『barcode頭』走到街好引人注目,我驚人哋望佢多過望我!不過揀男朋友最緊要係心地好!」

唔揀barcode頭,但如果有一日barcode頭找上你呢?意思是假如有日詩雅起身發現自己變成「barcode頭」,會點?「我會即刻落超級市場,將個頭拍落barcode機睇吓嘟唔嘟到,我好想睇吓我值幾錢!」能夠咁冷靜處理,詩雅的「危機意識」的確唔錯。

達哥洗濕咗個頭,詩雅問咩都要應承啦!