【開心速遞】陳偉琪一拖三遊泰攰到爆 細龍太真人原來好有愛

撰文:陳栢宇
出版:更新:
陳偉琪在社交網站貼出這張性感靚相,引來不少網民讚好。

處境劇《愛.回家之開心速遞》中,代表大房派的「大小姐」林淑敏和代表二房的「細龍太」陳偉琪(Vicky)經常在「威龍百貨」裏面鬥法,好多觀眾都覺得Vicky串串貢之餘仲背夫偷食何啟南好衰格,非常乞人憎。不過,戲外嘅Vicky其實相當識做,放低辦公室政治的她最近便到了泰國布吉旅行,期間性感大解放,以針織大Deep V泳衣騷Quali。尋晚在網上貼相公開裝束的Vicky就吸引到好多人留言同讚好,她在留言寫道:「Let me be your sunshine on this rainy day.」

Vicky接受《香港01》訪問時,便指自己已經叉完電回港:「其實我係同爹哋媽咪,仲有我一個Best Friend去嘅,散下心咁。雖然湊住兩個老人家都幾攰,要揸車載佢哋周圍去,但係我好開心,好珍惜有咁嘅機會,佢哋年紀開始大,趁佢哋行得走得,想帶多啲佢哋去旅行。」她又指今次旅程其中一個目的是練拳:「跟返我之前泰拳師傅練,嗰條街其實都多訓練中心,亦好多Massage,之前試過抽一星期去泰國練拳,練完拳曬太陽再揼骨,之後繼續練拳。」

除了陪父母周圍去,陳偉琪遊泰其中一個目的是練拳。
+2

Vicky不時走去練拳,豈不是會悶親爹哋媽咪?她即笑指兩老節目多多:「佢哋懶到死,不停揼骨揼骨揼骨。(唔叫佢哋打埋一份?)我爹哋淨係見到我打拳件衫好型之後再跟我買多件咋!」至於旅程中有否其他搞笑事?Vicky笑說:「去到邊度啲人都係同我講泰文,個個都以為我係泰國人!出境時個移民官仲問我拎電話。(畀咗?)冇呀,之後先覺得唔抵,因為畀咗可能下次過關唔使排隊。」

陳偉琪笑指自己被誤以為是泰國人。

Vicky其他靚相:

+20