【早霸王】男聽眾戀上已婚男同事 勇敢公開表白：想講聲我愛你
撰文：鄺鈺瑩
出版：更新：
繼「阿希事件」後，又有男聽眾打到「你知唔知道有人掛住你」向同性表白。（網上圖片）
相信如果有follow開森美同小儀主持的「你知唔知道有人掛住你」表白環節，一定對「阿希事件」印象十分深刻，事緣數年前呢個環節仍在《架勢堂》時，有名叫「管家婆」的男聽眾，希望藉節目同「阿希」表白，不過，當電話接通後，森美先發現原來「阿希」都係男仔，此料不及的發展，令森美當時只能吐出「阿…阿希…啊…啊…啊！」
不過森美得知對方原來已婚，就決定唔會接通另一方電話，以免「搞亂人哋生活」。（網上圖片）
經歷過「阿希事件」後，相信森美對於同性表白已經好識得處理。因為就喺今日嘅「你知唔知道有人掛住你」環節，接到一名叫Johnson嘅男聽眾電話，表示想對公司男同事表白，他更以「表面上唔鍾意，實際上應該鍾意」形容對方的性傾向，又指「同事成日傳我哋有嘢，佢當然否認，我就半推半就。」Johnson話二人曾在annual dinner上一齊玩夾蕉遊戲，有感與對方十分投契。
森美問怕唔怕表白後會影響到自己工作，Johnson其實都有少少猶豫。（網上圖片）
不過，就係準備打電話之際，Johnson就竟然講咗句「佢結左婚……」森美同小儀都即時靜咗，但亦好快咁解釋比Johnson聽「你會搞亂人哋生活。」森美強調唔幫佢表白並非與性傾向有關，而係「佢有婚姻，你就要尊重，雖然你嘅愛係無錯」Johnson聽完之後，就話「我無話佢唔鍾意另一半，但我覺得佢好似鍾意我。」至於有幾鍾意呢？Johnson獨自表白時，就提到「你夾蕉嗰時真係好迷人，我知你未必接受我，但我都想講聲我愛你。」雖然最後都無公開呢位已婚男同事的姓名，但Johnson表白時，就稱對方為「白雪人」，更指呢個係二人之間的暱稱。