「嚴謹」張達倫主動降呢棄做親生仔 賺人仔不忘本：冇TVB冇我！
撰文：陳栢宇
出版：更新：
相信各位電視精仍然記得處境劇《愛‧回家》裏面深愛住霞姐的暖男「嚴謹」，張達倫（Max）自從飾演完這個形象入屋的角色後，在其他劇集中的戲份亦愈來愈多，更在不久之前拍完的《好日子》中首次升呢做第二男主角，絕對有機會行多一步成為男一。不過，張達倫最近卻決定唔做TVB親生仔，由經理人合約轉成基本藝員合約，令人有少少出奇。
無綫藝員張達倫在5月底由經理人合約轉為基本藝員合約。兩者最大的分別是無綫會主動為經理人合約藝員接洽工作，但會抽大約30%佣金，較基本藝員的大約20%為高。（資料圖片）
張達倫接受《香港01》訪問時便指轉合約這個決定其實是試一試新工作模式：「因為喺TVB已經十幾年，都想試下可唔可以自由度大啲。之後同羅天池合作拍網絡大電影《命運老虎機》，反應都OK，嗰邊都問我會唔會繼續試。其實我同TVB關係都好好，轉合約嗰邊珍姐（曾勵珍）都話日後有問題都可以同佢傾下先。」
至於之前拍網絡大電影搵到幾多？張達倫坦言：「拍一套要10至12日，都搵到6位數字嘅。（你依家喺TVB大約有幾多錢人工？）其實唔定，但正常都有5位數字。」記者指他一個月拍兩套網絡大電影已有TVB好幾倍月薪，張達倫即謂：「邊有得咁計，唔可以咁比較啦。我喺TVB賺到嘅嘢都好多，冇佢我冇咁多機會，冇得做嚴謹，亦都冇可能同蘇玉華、張衛健合作。」
張達倫亦有在熱播劇《宮心計2深宮計》亮相，客串演出太平公主陳煒的首位丈夫薛紹。（電視畫面）
+3
講到張達倫最近榮升到男二級數，問會否怕轉約後再沒有此機會？他說：「都有好多人話我好衝動，但我又覺得依家唔博幾時博。唔知呢，應該唔會冇機會嘅，最緊要係睇個演員嘅價值，有價值一定有機會。其實，角度有冇得發揮，緊要過係唔係主角好多，嚴謹都唔係主角嚟。（有冇諗過索性好似羅天池離巢兼重心放內地？）咁唔得，生咗個B冇耐呀，想見佢多啲。」他又指老婆好支持他轉做新合約：「佢想法同我好近，只係擔心我會唔會成日唔喺香港。」正拍攝《白色強人》的他亦指完成此工作後，暫未有其他工作安排，相信公司是想讓他有更多時間接洽其他工作。
張達倫前年11月與青梅竹馬的舊同學陳鳳玲（Kimmy）成婚，兩人翌年10月誕下麟兒張凱碩，加上前妻所生的繼續，一家四口非常幸福。