張學友入行34年自覺未夠好：但我打算繼續做落去
撰文：鄺鈺瑩
出版：更新：
張學友以嘉賓身份現身香港演藝學院，一出場即獲如雷掌聲。。（視覺中國）
歌神張學友三年前獲香港演藝學院頒授榮譽院士，以表揚他在表演藝術的成就，獲獎無數的他當時都非常之開心，更表示無諗過可以着袍。3年後，歌神再現演藝學院，不過呢日就係以嘉賓身份上台，同學生分享他在演藝圈34年的經驗，而佢嘅開場白竟然係「原先唔打算跟稿讀，但在拍咗兩百幾次掌，突然叫我名字，我乜都唔忘記，所以都係決定睇稿讀。」
學友指當年的《雪狼湖》舞台劇起用了不少演藝學院的學生，大讚眾人表現出色而且成了圈中的中流砥柱。（視覺中國）
學友提到當年係以歌手身份入行，並指身邊朋友分別透過熟人介紹、選美、星探發掘以及完成演藝學院課程而入行，他說當年入行時充滿了好奇心與期待。「如果你問我可唔可以當成終身職業呢？我會説好呀！收入仲……幾好添。我之所以咁答，因為我係比較幸運的一群，我好幸運地在這一行工作了34年，而我亦打算繼續落去。」學友向台下的學生表示要搞清楚自己追求什麼，如果係想發大財的話，他會建議大家馬上投身其他行業，因為在福布斯富豪榜上，頭百位都無一位大家熟悉的名字。「又如果你的目標是希望有更多人認識你，想紅的話，我認為自從互聯網和社交媒體蓬勃發展後，你根本唔需要浪費這麽多時間和汗水去苦練，再和其他人比演技、比歌藝、比專業才能脫穎而出，你只要在巴士上和阿伯吵一架，又或者拍條青春無敵、少一點布的嬉水片段放上網，說不定就一夜爆紅了。」
唔少網民大讚學友的致詞十分感人兼且熱血。
學友指自己入行多年依然覺得自己未夠好，但正因為未夠好才令他有進步的空間，這亦是他在這行業生存十幾年的主要原因。而他之所以入行，並視歌手為終身職業，他說原因十分老土。「係為咗愛，愛我們的工作，夠愛才可以不計回報，用盡我們所有的精力時間同青春，做一份未來唔知會點的工作。」歌神致詞雖然只係短短十幾分鐘，但相信台下已有不少人獲益。