韋家雄10月舉行婚禮　康華夠豪氣送金豬

由胡定欣、劉心悠、馬浚偉、馬國明、韋家雄、康華等人主演，無綫重頭劇《宮心計2深宮計》，在馬鞍山舉行「深宮終極劇鬥」活動，現場吸引過百「粉絲」，更與現場觀眾玩遊戲，氣氛熱鬧。

《深宮計》戲中飾演「成內侍」韋家雄在與演「南宮司設」的康華有感情綫，現實中兩人私交甚篤。現年53歲韋家雄與拍拖大半年Keynes求婚，已定今年十月六日舉行婚禮。康華笑說：「最近同家雄去買金比佢做賀禮，諗住送成串金豬比佢啦，佢話唔要喎，要實心唔要空心，仲叫我送層樓俾佢，之後我諗到送個空心金馬桶俾佢，仲同佢未婚妻講，話佢係「空心老官」，有咩事過嚟搵我。」韋家雄搶笑話：「因為我冇攞過金馬獎，送個金馬桶俾我都好，要實心嘅，結婚使好多錢，康華有幾疊樓揸係手，送面個「浸」都好呀！」

婚禮定於10月舉行，現正籌備婚禮。家雄表示「一切籌備中，會用傳統行禮方式舉行婚禮，都會擺酒，邀請圈中好友，忙完手頭上嘅工作，就會同太太喺香港影一輯婚紗相，之後有時間再會諗去其他地方影。」家雄笑言還特別邀請康華當日做兄弟，相信到時又有星級兄弟團出現。