《宮心計2》預告點擊率40億派「福利」 監製梅小青準備半裸照
撰文：賴家杰
出版：更新：
《宮心計2深宮計》播放以來一直成為熱話，而監製梅小青及一眾演員為劇集網上點擊率衝破31億而舉行慶功宴，小青姐對於呢個數字都十分滿意，「自己其實都預計會受觀眾歡迎，但到呢個數字真係畀到我哋一Team人好大嘅鼓舞。」
衝破30億時，劇中主要演員都於個人社交網站發放「福利」照片回饋粉絲，小青姐當然知道演員嘅舉動，原來小青姐都準備咗「福利」畀大家，「其實我自己都搵咗一張嘅，如果真係可以到40億就出啦。我當然好希望有呢個數字啦，我都知道大家係想睇演員啦，所以我會叫佢哋識做㗎啦。」小青重點提到自己張相真係半裸，不過已經係多年前了。
監製梅小青預聯同一眾演員出席《宮心計2深宮計》慶功活動。（葉志明攝）
由黃心穎飾演嘅甘若芊一角深得大眾喜愛，但可惜慘死收場，問到小青姐有否拍另一個版本結局呢？小青姐話：「冇，結局就只有一個，大家要睇結局會有好多驚喜。」但咁受大眾歡迎又有一個好嘅成績小青姐會唔會考慮再拍續集？小青姐表示正忙緊籌備《法證先鋒4》，不過小青姐都收到大家嘅聲音，所以都會考慮一下。