【世界盃】ViuTV收視屢創新高 TVB定過抬油「派」古天樂迎戰
撰文：洪曉璇
出版：更新：
今屆世界盃多隊傳統勁旅先後出局，四強賽事儼如歐洲國家盃一樣。由於今屆比賽時間對香港市民嚟講相當靚，唔使點捱夜就可以欣賞多場賽事，購入播映權嘅ViuTV成功刀仔鋸大樹，收視不停創新高。眼見各節目收視都受到重擊，嚟緊4強及決賽TVB又會唔會變陣迎戰？從今日更新嘅節目表就知，TVB決意以古天樂迎戰世界盃決賽。
英格蘭相隔28年再入世界盃4強賽事。（影片截圖）
面對四年一度全球盛事，TVB一直懶懶閒，除咗提早啟動AMAZING SUMMER之外，基本上無就ViuTV免費播放賽事，而作出節目調動。早前英格蘭對戰巴拿馬最高收視更一度衝上20.5點，約有171萬觀看人次，刷新ViuTV開台紀錄。今屆英格蘭成功殺入四強，大有機會再為ViuTV搶高收視。
嚟緊嘅準決賽及決賽都會免費播映，ViuTV要再創收視紀錄應該唔難。（ViuTV FACEBOOK）
TVB宣布決賽當晚節目表，由9點開始播電影《使徒行者》，晚間新聞後再一次過播兩集《刑事偵緝檔案4》。（TVB.COM截圖）
7月15號晚11點，就會舉行世界盃決賽，由ViuTV免費播映，呢個時間食完晚飯相信好多香港市民都未瞓，四年一度睇埋決賽參與一下都好正路，ViuTV要再創收視新高真係話都無咁易。TVB今日（８號）已經更新至15號節目表，可以見到當晚9點至11點30分，會播放古天樂、張家輝主演嘅電影《使徒行者》，晚間新聞後再一次過播兩集《刑事偵緝檔案4》，見足古天樂4.5小時真係會吸引過世界盃決賽？無端端要「披甲上陣」打收視戰，唔知古仔又會支持邊個台呢？
《使徒行者》電影版係古天樂主演。（劇照）
《刑事偵緝檔案4》又係古天樂主演。（影片截圖）