【深宮計】黃心穎劇中演技大爆發 收過千留言：嗰下我真係眼濕濕
撰文：賴家杰
出版：更新：
最近黃心穎一直忙於拍攝《牛下女高音》呢一套新劇，所以佢缺席咗幾次《宮心計2深宮計》宣傳，不過今晚大結局，心穎當然盛裝出席，並表示自己一直都好想出席所有宣傳：「今晚同大家睇大結局，自己真係會好唔捨得，自己一直都有追，可能今晚情緒會比較失落，其實由一星期前已經開始唔捨得了。」
《宮心計2深宮計》今晚大結局，一眾演員聚埋一齊睇大結局。（梁碧玲攝）
由黃心穎飾演嘅角色甘若芊深受大眾喜愛，而角色喺劇中已死亡，網民紛紛大喊唔好，心穎當然有留意網民嘅留言，心穎透露：「有一晚我番屋企啦，預告講到話我會出事，佢哋好緊張，差不多有一千個留言問我有冇事，嗰一下我真係眼濕濕，終於努力番嚟嘅事情有人睇到，好開心。」馬國明同黃心穎劇中生離死別都令到唔少人流下眼淚，更多人講到心穎演技大爆發，有相當大嘅進步。心穎自己都睇咗好多次，佢直言自己都喊咗好多次，但問到係咪全因為對手係馬國明先令到佢演技咁好呀？心穎自己都有諗過呢一個問題：「當然因為佢都係一個好對手，我哋之間都好入戲，個場戲喊到腫哂，令自己隻眼都唔知去咗邊，但我都會覺得係編劇佢哋寫得好好，當然因為有佢（馬國明）所以更加好啦。」
心穎表示劇中自己死亡時候都睇到喊。（梁碧玲攝）
呢一套劇反應實在太好啦，喺網上點擊率達到30億時演員們更紛紛發放「福利」照放上網，心穎都唔例外，但問到今晚大結局之後點擊率再高會唔會考慮一下發放同馬國明嘅閃光彈？心穎回答：「生活照？可能今晚影一張啦，其實好多人都講冇事嘅，劇中結局做唔成一對，現實好Sweet咪得囉，佢哋好想我Post sweet照，考慮考慮一下啦。」
心穎講到反應會更好就發放同馬國明生活照畀大家睇。（梁碧玲攝）