「宇宙G.E.M.」鄧紫棋出道10周年　佛山演唱會居然「拍烏蠅」？

7月10號係G.E.M. 鄧紫棋出道十周年嘅日子，由當初嘅金魚嘴妹妹，到今時今日站上國際舞台巨星地位，實在得來不易。前日G.E.M.去到佛山舉行巡迴演唱會，居然出現「拍烏繩」情況，到底發生咩事？

相隔四年再踏上佛山舞台，但G.E.M. 透露呢度原來曾經係佢嘅傷心地，因為四年前嘅情人節佢失戀不到兩星期，剛巧在佛山開演唱會，當時感覺整個世界準備塌下來。G.E.M.於台上眼泛淚光表示：「可能很多人也有同樣經歷，但無論你的生命發生甚麼，世界也不會停下來，你也要繼續過日子，你也要堅強起來。一眨眼就四年了，今天在佛山感覺不一樣了，當我重新提起受傷的事，我可以坦然面對，因為我在路上發現很多愛我的人。」

Encore 環節有位不速之客兩度上台偷襲 G.E.M.，這位特別嘉賓就係隻大烏蠅！當 G.E.M. 自彈自唱《睡公主》時，呢位「蠅男」竟飛到佢支咪上氹氹轉，嚇得G.E.M.花容失色：「有隻烏蠅呀，佢死都唔走喎，係咪應該唔理佢呀？」正當 G.E.M. 打算繼續唱歌時，「蠅男」愈走愈近險飛進G.E.M.個口，令佢終於忍不住大叫求救：「我好驚呀，有冇人可以救我呀！」最終使出「趕烏蠅三式」－吹、搖、拍，先可以擊退呢隻大烏蠅，引得全場大笑。