【BB來了】李佳芯盧宛茵展婆媳大戰 新抱奶奶永遠睇對方唔順眼？
自古以來最難解決嘅，就係婆媳糾紛，幾乎所有長老健在嘅家庭都無法避免，早前就有調查指，新抱同奶奶最佳居住距離，係超過一小時車程。但香港地咁細，真係好難做得到。TVB新劇《BB來了》中李佳芯同黎諾懿本身住喺開放式單位，兩公婆當然無問題，但意外懷孕後要搵屋搬，種種原因下黎諾懿希望搬到阿媽盧宛茵樓下，Ali非常大反應話：「要我搬去佢樓下，寧願呢世都唔買樓 !」婆媳點解永遠都對立？
【BB來了】女強人忽然Bingo做媽媽 李佳芯忐忑心情網友讚有共鳴
劇中Ali係相當有骨氣，希望靠自己嘅女強人，由拍拖到結婚到有BB，其實一直得唔到奶奶歡心。身為闊太嘅Madam Lo亦恃勢凌人，兩婆媳刀來劍往，加上飾演Ali媽媽嘅陳秀珠，三個女人何止一個墟，簡直似世界大戰一樣﹗唔少觀眾都話身同感受，莫非呢個世界真係咁多衰奶奶？
當眾「唱」新抱
第一集奶奶Madam Lo出場，就係同一班闊太去到黎諾懿餐廳聚餐，喺眾多朋友面前放箭，窒新抱先斬後奏旅行結婚，唔擺酒攪到自己無面；結咗婚又唔肯生仔嫌錢腥。好多觀眾都話拍拖時少見面好地地，到談婚論嫁奶奶就會現形，由行禮形式到婚宴場地，甚至著咩衫都要干涉，真係唔知邊個結婚。婚後想過下二人世界又日催夜催，網友不禁講句：「咁想生不如你自己生。」
事事向錢看
老人家想抱孫其實唔難明，但係不停將「生BB就俾錢你地做首期」掛在口邊，由幾時開始BB變成一件貨物一樣，有價錢可以衡量？到兩家人食飯，Ali諾懿話俾一萬蚊象徵式當租金兼家用，Madam Lo當住親家面前大大聲話：「我咁多錢使咩你俾啫﹗」難怪Ali都話就算有經濟壓力都唔想接受施捨：「唔想BB學佢咁，事事向錢看！」
干涉教B湊B
每對父母都有自己一套湊BB方法，有啲好緊張不停要消毒，有啲禁止小朋友3歲前睇電視，呢啲都係BB父母嘅選擇，旁人都應該尊重。不過奶奶們經常覺得自己先係權威：「我咪又係咁湊大兩個﹗」好似Madam Lo「好心」搶住埋單添置BB用品，點知就私下將Ali訂嘅嘢改晒，仲大聲夾惡話：「有奶使乜雙泵，無奶嘅單泵就得；奶樽消毒器邊及熱水烚奶樽好﹗」
Ali最終妥協搬入奶奶樓下住，黎諾懿雖則同外母奶奶約法三章，兩邊都唔俾鎖匙，湊BB方法一切以媽媽做依歸，不過Ali被逼搬，媽媽陳秀珠又點會感受唔到，好在佢都不是省油的燈﹗兩家人坐低食飯，企硬講句：「點都唔會俾個女搬去奶奶樓下受氣﹗」又買定大批BB用品，表明做Ali最強後盾：「女人有外家返先會矜貴﹗」作為準媽媽，聽到呢句真係好warm好sweet﹗