【BB來了】黎諾懿聞「媽媽谷」色變 李佳芯即Join真係港媽必入？
個個媽媽都話自己忙到不得了，在職媽媽工作忙返到屋企更忙，全職媽媽更加要24小時ON Call年終無休。不過大批媽媽最近再忙都要追劇，講緊嘅係TVB新劇《BB來了》，因為佢地好有共鳴呀﹗當中提到嘅「港媽王國」媽媽谷，女觀眾聽到不禁笑出聲，開電話數下自己入咗幾多個，男觀眾就話：「好似邪教一樣信徒遍佈全港﹗」到底媽媽谷咩嚟？有咩咁吸引？
劇中Ali產檢後喺街頭，撞見產前班嘅同學仔被邀請入媽媽谷，見到黎諾懿即時一臉嫌棄，唔少網友都笑言：「老公話好似邪教唔俾入呀﹗」媽媽谷其實正解係媽媽Group，孕婦於Facebook、Wtsapp認識同路人，就如Ali所講：「有跟地區有按生B月份，可以交流下生B同湊B心得，仲有定期聚會﹗」
佢地即時就跟咗去媽媽谷聚會，黎諾懿作為場內唯一男士實在大開眼界，眼見在場媽媽挺住籮咁大嘅肚，一時呻：「怕有妊娠糖尿醫生唔俾亂食嘢。」一時又八卦下貪靚媽媽曬命。在男士眼中睇落，黎諾懿只覺得：「一班師奶自暴自棄，講是非吐苦水FF自HIGH。」仲相當擔心老婆Ali由高學歷有氣質嘅港女淪落成港媽。
【BB來了】女強人忽然Bingo做媽媽 李佳芯忐忑心情網友讚有共鳴
不過作為媽媽嘅Ali就會明白媽媽谷嘅重要性。無論有無返工，丈夫再體貼，都無可能24小時陪喺身邊，由剛開始懷孕搵邊個醫生好，身體出現微妙變化不知所措，即時去Group內問同路人，回覆可能比上網查Wiki，即時Google都要來得快狠準。好似Ali劇中咁，因為子宮漸大壓住膀胱，每晚要起身去幾次洗手間，到BB出咗世每隔兩個鐘起身餵夜奶，身邊人都未必可以次次起身陪伴，反而到Group呻幾句，知道大家都一樣經歷，反而心情會好返啲。
【BB來了】李佳芯盧苑茵展婆媳大戰 新抱奶奶永遠睇對方唔順眼？
身邊有朋友足足入咗5個媽媽谷，跟地區嘅可以問區內邊個產科兒科醫生比較好；醫院谷可以問走佬袋執啲咩；同月谷大家懷孕階段相約，可以互相提醒幾時做無創幾時照結構，飲糖水測糖尿超標可以點做；到BB出咗世可以搵到一堆同年同月同日BB一齊聚會，由出世起就幫小朋友搵定朋友仔。人多仲可以爭取到團購優惠，買尿片奶粉靚靚BB衫都可以有Discount，慳得一蚊就一蚊，齊齊做個精明嘅靚媽﹗