【全民造星】卓韻芝不只教咬字應對 連心理輔導都做埋？
撰文：郭芷晴
出版：更新：
ViuTV節目《全民造星》開播在即，作為星級導師的卓韻芝 (阿芝) 昨日 (16日) 也出席記者會做宣傳。不講不知，原來阿芝在節目中身兼數職：「其實我都幾多野做，首先要執咬字，好似唱歌時候嘅發音咁，再進一步就係說話同應對嘅能力，例如點樣回答評判問題，因為評判真係可能就憑你講個幾句說話而記得你或者淘汰你。」最意想不到的是阿芝要兼任節目組的「心理醫生」：「有啲參賽者會話同隊員唔啱key，有啲又會突然間講『阿芝我唔玩喇！』想中途退出，我就即刻媽媽上身，問佢地咩事，令我諗返起『芝see菇bi接電話』。」
阿芝不單止要教咬字和應對，更充當起參賽者的「心理醫生」。(陳順禎攝)
《全民造星》的玩法是由Team A及Team B兩組導師分別指導若干參賽者，再交由公眾評審，而屬於Team B的阿芝亦有和隊友相討「戰略」：「我地隊長係Eric Kwok (郭偉亮)，好多時大家會有唔同意見，要問返相對應部門嘅專業同事。有時有啲學生表現差強人意，但教教下就會好，但有時有啲係教極都係咁。」她補充同組導師側田非常坦白，會直接評價一個學生是否「孺子可教也」；至於舞蹈方面的問題，就會請教麥秋成。但無論導師如何掏心掏肺地培訓學生，最終出來的結果也未必盡如人意：「有幾集我地幾個導師都睇到揼心口，因為明明有啲學生我地覺得ok幾好，但推出去之後評判反映係『唔鐘意』，『睇唔明』，所以我地好似同參賽者一樣，經歷心情上嘅大起大跌。」
阿芝的心水未必就入評判眼，有時係後台睇到揼心口。(陳順禎攝)
問到Team A的參賽者大多高大靚仔，而Team B的則百花齊放應有盡有，阿芝表示：「我地呢組係睇talent，雖然你見又有肥仔，又有同我差唔多高嘅，我保證唱得最好，跳得最好個幾個全部係哂我地到。」似乎對「自家出品」甚有信心！