【金管局實測】賭戲入面嘅「篋」究竟裝到幾多錢 電影原來有錯?

撰文:黃梓恒
出版:更新:

講起舊時香港電影,「賭」片一定走唔甩,周潤發《賭神》系列,到劉德華嘅《賭俠》,再到周星馳領軍嘅《賭聖》,套套都係經典之中嘅經典。除了一貫緊張、快上快落嘅劇情之外,賭枱上點樣運用各種能力或者計謀去贏對方,都係「賭」片入面嘅精髓。而係賭枱上,賭具當然係重要,即係賭啲乜。其次就係錢,無錢就要賭籌碼,睇落個氣勢都爭咁截,而啲錢唔係少少咁拎出嚟,有睇過都知,啲主角係鍾意成篋錢拎出嚟倒喺枱,咁先叫氣勢呀嘛!

拎起錢就猛倒落枱。(電影《賭俠》)

通常裝錢嗰個篋,錢一定唔會少,閒閒地都有二、三千萬喺入面,其實究竟係咪真係可以放到咁多錢入去呢?香港金融管理局在今日發佈了一條影片,內容就係講成日喺戲入面見到嘅篋,究竟放到幾多錢入去,仲有唔單止篋,連紅白藍袋都有進行測試。片段中所見,原來一個篋只係可以裝到五千張一千蚊紙,即係五百萬,不過電影入面好多時都唔係用港紙,所以又唔可以話係錯。而至於紅白藍袋,塞滿佢係可以袋到七萬張一千蚊紙,即係有成七千萬!唔怪得戲入面嘅大賊成日拎紅白藍袋。

究竟個篋有幾多錢?(網上圖片)