鄭嘉穎陳凱琳結婚？ 樂小姐：Grace同嘉穎啲兄弟都請晒假
撰文：黃欣華
出版：更新：
鄭嘉穎與陳凱琳拍拖三年，有傳下月12日將會在峇里拉埋天窗，更有人爆料指陳凱琳由媽咪陪同下做產檢，疑似雙嘉臨門。無綫高層樂易玲今日〈25日〉出席《宮心計2深宮計》祝捷晚宴時，被問及此事，都有作出回應。
圖片來源：視覺中國
【獨家】鄭嘉穎陳凱琳真係雙喜臨門 讀者報料：已經做咗三次檢查
樂小姐指：「其實早幾個月之前，Grace就請假，我哋都批咗，係個好短嘅假期嚟嘅。我哋果陣大家都覺得佢係幫嘉穎慶祝生日，我依家都唔知佢係去結婚定慶祝生日。」樂小姐雖然唔清楚嘉穎同Grace究竟係結婚定慶祝生日，但就透露唔止Grace向公司請假，連他們相熟嘅藝人都有向公司申請假期：「咁我都見到嘉穎有好多好朋友、好兄弟，同佢合作多年嘅藝人都有請假，不約而同都係嗰段日子，可能佢真係去慶祝生日嘅。」
（陳順禎攝）
成大班人特登請假幫嘉穎慶祝？記者梗係唔信，所以繼續追問Grace係咪有咗BB，樂小姐就話：「我又唔覺喎，我見過佢又見佢乜嘢都無喎。我問過佢，啲同事又問過佢，Grace都話唔係呀！」至於會唔會買禮物俾嘉穎做生日禮物抑或新婚禮物，樂小姐就話暫時未諗，仲透露嘉穎喺大陸拍完劇就會約佢同Grace出嚟傾下。
（陳順禎攝）
對於最近有傳樂小姐花880萬買樓，樂小姐就坦言確有此事：「樓花咋！有排都未洗俾錢，我都係幫屋企啲細路。〈投資?〉幫下手，幫佢哋上車啫，等佢哋讀書等佢哋自己供！」
（陳順禎攝）