【中國好聲音】四導師爭一學員 謝霆鋒使橫手除衫騷肌搶人

撰文:洪曉璇
出版:更新:

明知慾望無限但選擇有限,但人總係貪心希望得到更多更好。謝霆鋒於《2018中國好聲音》擔任導師,第一集已經率先夠籌收滿6位學員,不過佢又驚錯過咗自己鍾意嘅聲音,所以就算自己嗰組已經full house,但第2集都繼續同其他導師搶人,仲keep住「快、狠、準」嘅揀人風格。

霆鋒繼續幾秒就轉身搶人,激到其他導師扎扎跳。(影片截圖)

繼第一期有學員唱咗《黃河謠》二秒,霆鋒就即刻㩒掣轉身,將佢收歸旗下後;今次選手鄧紫霄就選擇唱番導師謝霆鋒嘅《因為愛所以愛》,雖然學員唱自己歌,但霆鋒聽到最後一秒先㩒掣轉身,霆鋒同學員講:「選曲唔係太啱,但聲音打動咗我。」最後仲俾咗第二次嘅演唱機會佢。

揀導師嘅歌參賽到底有無著數?喺霆鋒身上真係未必WORK。(影片截圖)

除此之外,另一位學員李佳丹唱完後,四位導師都爭崩頭要人,霆鋒更不惜使「橫手」,喺呢位職業係健身教練嘅學員面前,大晒粗壯結實嘅麒麟臂線條,從而得到共鳴,動手又動口,之後佢又出口術,表示自己已經開始為學員編曲,為嚟緊嘅比賽做準備,「你嘅音樂風格更適合留喺我嗰組。」最後霆鋒嘅真誠同盡責深深咁打動咗呢位學員,加入咗霆鋒嘅戰隊。

為咗搶學員搞到除衫,霆鋒真係好狠呀。(影片截圖)
+7