【開心速遞】主動追求熊若水？　張景淳：龔燁係行動派一定會出招

張景淳月前已經重返了《愛‧回家之開心速遞》劇組，令一眾劇迷都好期待他的演出，今晚 (8月1日) 他飾演的龔燁終於再度出場喇。他會延續同熊尚水 (呂慧儀飾) 的感情線，由之前的冤家發展成極有好感曖昧關係。而一出場呢集為了接近若水兼測試若水可唔可以共患難，仲不惜瞓街。問到龔燁可會主動出擊追求若水，景淳說：「阿龔係一個行動派嘅人，同埋佢所有嘢都好主動，所以一旦佢覺得有嘢想做，覺得應該要做，咁佢其實都唔會考慮㗎喇，一定係會採取行動出招。佢離開同返去威龍百貨都係因為若水，所以佢必定係會做啲嘢喇，一定會成日去接近若水嘅。」

至於阿龔有無信心爭贏落力追求若水的曹總 (劉一飛飾)，景淳說：「我覺得曹總好多嘢都係用錢嚟令人去做某啲嘢，如果要鬥錢，阿龔絕對唔會夠曹總鬥，但如果大家都無錢嘅話，阿龔嘅手法絕對優勝過曹總嘅。會唔會同曹總爭過就要睇編審嘅安排喇。」提到劇中好受歡迎的CP：大小姐 (林淑敏飾) 同送水輝 (許家傑飾) 以熒幕情侶檔接Job搵真銀，景淳同呂慧儀當然都想好似他們一樣啦，他說：「其實我哋兩個都一齊拍咗個廣告，遲啲就會出街。」