林作預告進軍樂壇 孖師妹黃意雅唱情歌
撰文：黃欣華
出版：更新：
林作做歌手？又搞邊科呀？林作自從舊年放棄大律師執業後，就簽范振鋒做經理人殺入娛圈。除咗拍戲、做主持，仲返埋大陸參加綜藝節目之外，佢日前就喺IG post咗張喺錄音室嘅相，仲自嘲話：「為咗紅，不擇手段，連歌都唱埋，可恥！」
林作把聲好有磁性，唔知出嚟效果會點呢？
雖然林作為咗紅，不擇手段。但佢就話今次絕對唔係搞Gag：「今次好認真，唔係諗住搞Gag，係有去練歌㗎！MV都會拍，就嚟開始，但我個樣出到嚟，人哋已經笑。」至於問到點解會有呢個諗法，林作就話：「其實舊年我簽阿范嘅時候，佢同我講話不如整首歌，我話好呀。但呢個idea一直擱置到幾個月之前，填詞人薑檸樂同歌手黃意雅又夾咗啲嘢出嚟，咁我咪貢獻我把聲囉！」
黃意雅就爆料話林作錄咗好耐，搞到佢開唔到FB live！
林作仲話自己一直好討厭唱歌，但自問把聲都OK，仲講笑話：「不過溝得女嘅聲，唱歌應該都OK。」除咗做歌手，林作亦透露嚟緊又會有新搞作：「我想嚟緊嗰年接黃子華棒做棟篤笑，講娛樂圈血淚史，攞呢首歌嚟做個前奏，但就仲未同公司傾」。林作連棟篤笑都想撈埋，唔知大家又Buy唔Buy呢？