吳業坤誓要變肌肉男：以張家輝《激戰》身形為目標

吳業坤、鄺潔楹周六現身將軍澳《夏日鬆鬆遊樂園》活動。兩位型男索女更大展歌喉，獲現場粉絲力撐支持，兩人全程投入落力演出搏得全場掌聲。

吳業坤（坤哥）近日身型越來越fit，喺咪想做男神？「近期做緊gym，因為之前我就覺得色藝俱全就夠啦，覺得色呢樣嘢可能我覺得冇乜所謂啦，但我又覺得作為一個全面啲嘅藝人，例如喺拍劇集嘅時候，做唔同嘅角色呀，唔同嘅Fashion都可以做到，如果我再放任自己，我會覺得對唔住啲觀眾，唔喺話跟住呢個潮流，喺對自己嘅要求。」

坤哥透露自己體重曾達180磅：「喺我好努力之下減左10磅，有次見到徐榮佢話：「哇，你瘦咗成十幾磅呀。」自己聽到都好開心，個變化人哋喺睇到，所以我希望推動大家去做運動，其實每次睇到有成績，就會好有動力去做呢件事。」終極目標想練到好似張繼聰、張家輝健碩身形？「兩位個身形我都好鍾意，張繼聰好Man好大粒，自己都想練到張家輝咁嘅身形，好收身嗰種肌肉男，依家向住呢個目標進發中。」