孫慧雪產後修身成功再影寫真：三管齊下2個月見效
以前結咗婚生小朋友，即使唔做主婦相夫教子，事業上都少有再搏殺，扮靚嘅日子更加係一去不復回。孫慧雪話晒係宅男女神，但去年結婚懷孕，孕肚巨到好似陀孖胎一樣，BB出世後要餵人奶又唔可以過份節食。但雪雪身體力行話俾大家知：「世上無醜女人只有懶女人」三管齊下怒減27磅，呢日仲再披戰衣影寫真，Fit到不禁令人質疑係咪婚前影落架﹗雪雪即時扮嬲話：「尋日影架﹗不過多謝你，証明有成果哈哈﹗」
孫慧雪43吋巨肚惹雙胞胎疑雲 8月生得：BB太巨型可能要開刀
5號夜晚忽然見到阿雪上載一張新相，扎起丸子頭著住白色lace Bra Top少女味濃。之前阿雪出席活動時仲有啲肉地大呻要努力修身，原來默默努力已經有成果﹗阿雪接受香港01訪問時笑言：「呢張相尋日影完即晚收到即刻Po，呢排都好俾心機減肥，由生完147減到120磅，比生B前仲差5磅左右。」
新手媽媽就算有工人幫手，落力照顧小朋友，都無咩時間再扮靚修身，阿雪都話自己曾經Hea過，減肥永遠得把口：「因為8月中開劇，之前有段時間得個講字，到要拍劇有人個目標就可以下定決心。成個起居飲食生活習慣都要改變，飲食要節制，宜家有個Personal trainer教我用健康方法減磅，另外有紮肚，因為生完BB盆骨闊咗，三管齊下效果真係明顯啲。呢兩個月先真正俾心機落力減，落咗超過十磅。新手媽媽畀心機呀﹗真係只有懶女人無醜女人架﹗」
忽然出現呢張靚相，加上之前書展阿雪都有到場，不禁令人聯想起修身成功會唔會再出一本留念呢？「書展時其實好多人INBOX我之前本寫真有無得補購，本身講過無唯一一本，絕版就由得佢絕版做回憶。不過實在太多人問，司徒夾帶都有同我傾過要唔要影多本，自己都諗始終做咗媽媽，大家仲會唔會想睇，出一本健康性感，鼓勵下新手媽媽生完都可以繼續靚。」
話就話最緊要影出嚟靚，不過已為人妻人母，拍攝尺度都要諗下另一半介唔介意嘅。阿雪呢幾張相主要露腿同少少事業線，原來啲衫係佢老公幫手揀架：「本身都有啲緊張，生完BB後都無影咩靚相，今次算第一輯相，到底影咩造型，著咩衫好呢？老公完全無問題，覺得靚就可以，仲笑住話你終於返去以前靚嘅時候個狀態啦﹗」