《東張西望》主持梁麗翹呻菲傭「履歷滿分」 現實唔對辦:很失望

撰文:洪曉璇
出版:更新:
未生BB之前,梁麗翹係《東張西望》鐵腳主持之一。(梁麗翹IG)
+2

香港出生率一直處於低水平,一來養大小朋友花費甚鉅,二來湊小朋友人手亦係難題,即使有錢請工人都未必係解決良方。《東張西望》主持梁麗翹(Nicole)5月誕下囡囡Nanette,原本7月中就會復工。呢日Nicole於網上寫下長文,原來佢早已請工人但換來失望,唯有親自湊女:「夜半穿羊水入醫院,終於要生喇!緊張萬分,東西跌跌撞撞,噼呤棒冷,她房間的燈開着了,不過完全冇出來幫忙/詢問。。。那一刻,真的很失望。」

好多人建議梁麗翹請工人幫手,呢日佢寫下長文表示原來一早請咗但相當失望。(梁麗翹FACEBOOK)

劇集《BB來了》早前熱播,令觀眾發現陪月嘅重要性,但其實往後邊個湊BB都係一大難題,戲中李佳芯辭去工作親手湊BB,而梁麗翹本在懷孕時就提早聘請工人:「知道懷孕之後不斷抉擇到底有冇需要,最後都決定試一試。履歷話:有一年半照顧BB經驗,讀過護士課程,以前在加拿大工作,操流利英語,電話面試時對答如流。。。履歷滿分( at least perfect for us)!BB出世之前兩個月就請她早D嚟,希望佢可以早啲適應香港這新環境,亦希望能夠同佢盡快磨合,等佢融入我哋家庭。」

原本一早請咗工人,7月中梁麗翹就復工,點知……(梁麗翹FACEBOOK)
+2

Nicole自問將心比己,容許工人睇電視,工作完成晚上七八點已經可以入房休息,甚至問工人有無瞓晏覺習慣,雖然到埗後發覺貨不對辦,工人唔識煮飯唔識做家務唔識照顧BB,但都不及BB出世當日呢件事令Nicole傷心:「夜半穿羊水入醫院,終於要生喇!緊張萬分,東西跌跌撞撞,噼呤棒冷,她房間的燈開着了,不過完全冇出來幫忙/詢問。。。那一刻,真的很失望。最後,第一晚出院,BB跟她同房,佢全晚唯一問過我嘅問題,係BB喊,我抱左BB出去餵奶之後問嘅:「可否閂左道門?」那一刻,————。」

囡囡Nanette就嚟三個月大啦。(梁麗翹IG)

最終Nicole同老公決定送走工人,自己一手一腳湊囡囡,雖然少咗好多私人時間,但佢亦自覺幸運:「屋企個個都有彈性工作時間,可以互相配合;婆婆好掛住個孫,成日上嚟探B幫手;鐘點阿姨服務多年,做事快捷妥當,願意每個月騰出多點時間過來清潔;雖然湊B困身,但現在我哋事事親力親為,換來了睇住BB成長嘅機會;兩公婆向同一個方向努力學習,感情更勝從前。湊BB係辛苦,但唔痛苦;見到Nanette健康開心,值回票價。」

全職湊BB可能比返工更累,不過見到囡囡嘅笑容,真係咩都抵返晒啦。(梁麗翹IG)
+2