【特技人】黃子華透露曾差點誤殺特技人 海中暈足30分鐘冇人理
撰文：黃梓恒
出版：更新：
《特技人》昨日播出第一集，成集的劇情都是講May豬（朱晨麗飾）如何去勸服大志哥（譚俊彥飾）出山做特技人，要講成套劇最大賣點的動作畫面，在一開頭和回憶中，譚俊彥和溫家偉的確也有幾個「吊威也」，不過相信觀眾們絕對不夠喉。去到最後，譚俊彥終於有一場飛車戲，雖然爆炸場面都是用電腦特技，但飛車就真的是飛車，無花無假。
《特技人》劇中的飛車畫面。（劇照）
講起飛車，對特技人來說，這是一項具有危險性但又必要懂的事，而且飛車並不是只在路面上飛，有時要飛下山，甚至飛下海。黃子華曾經有一個經歷，當時他是導演，拍攝《一蚊雞保鏢》時，有一場飛車下海的經歷，是需要做上特技人，結果竟然差點累死那個特技人。
黃子華自己透露，曾經差點累死一個特技人。（資料圖片）
在他的《娛樂圈血肉史2》當中，他說：「我為咗呢套戲，我差啲令到一個人爭啲死喺我手上，係差啲啫，佢無死到。因為拍呢部戲，有一場戲係要飛車落海，嗰場戲西利囉，我係西環碼頭封晒路，搭晒起跳台，兩旁嘅途人係咁望實我呢個導演，幾巴閉。一action，個特技人揸住㗎Van仔衝落海，我從未睇過一部戲㗎車可以飛咁遠，足足有六呎，我唔知道人原來係可以跳得遠過部車。就係因為撞一撞，個特技人暈咗，喺水裡面。我哋唔知佢暈咗㗎啫，咪等佢上嚟囉。。。如是者，等咗3至30分鐘到喇，終於救返佢上嚟，好多人埋去搶救佢。我俾記者影咗張相，第二日出咗街，大字標題寫住『黃子華嚇到六神無主』，其實我當時係諗緊，我哋拍笑片，無非係想引人笑，咁要幾多人笑，先值得呢個人去死呢？我點同佢老婆交代呢？呀嫂，我哋呢部戲有4千萬票房，你老公都算死有余辜喇。」
黃子華在台上重新演繹當時被拍下的畫面。（網上圖片）
所以，做特技人的確有相當的危險性，在《特技人》中，芝麻（溫家偉飾）亦是因為遇上意外而下半身殘廢，的確要為一班特技人致敬！