【多圖】《廣告女皇》佳麗著緊身衫亮相　強調Sell內涵係重點

ViuTV全新節目《Good Night Show廣告女皇》，今日（15日）舉行探班活動，入圍佳麗總共有23人。可能大家會將呢個節目同《香港小姐》做比較，不過今次大會強調唔單單係選美女，仲要睇參賽者嘅內涵、如何Sell廣告技巧及最低成本成功宣傳廣告等，所以能夠入圍《廣告女皇》未必係靚女，想睇各佳麗質素如何，睇圖啦。

現場當然唔會放過同幾位參賽者做訪問，唔知大家仲記唔記得上次有一位18歲小妹妹考完DSE而去面試呢？佢今次成功入圍《廣告女皇》，呢件事情佢自己都估唔到。而佢亦係參選者中年紀最小，佢叫李曉鏵（Sharon）18歲，Sharon笑言今日好緊張，好少面對鏡頭。DSE放榜後Sharon之後會繼續升學，問到會唔會擔心參選呢個比賽會影響讀書？Sharon直言自己能夠應付到。

另一名參選者22歲，名字葉芷晴（Sharpay），樣貌唔算女神級亦唔係太出眾，至於點解想參加呢一個比賽？係因為Sharpay想挑戰一下自己，問到會唔會怕俾網民挑剔妳嘅樣貌，Sharpay直言：「其實見到其他參賽者都知道自己樣貌同身材輸蝕咗，但我優點係真誠及率直性格，自己都有心理準備會畀人攻擊，我都玩開Cosplay，有畀人攻擊過，練成一個鑽石心。」

其中一名參賽者大有來頭，曾參加過《美選D.n.A》，之前亦係組合FFx其中一員，雖然佢好快退出咗，因為理念唔合適佢，佢曾經更加於2016年出過寫真集，佢名字叫黃家慰（Candy）26歲。Candy透露今次參加呢一個比賽係因為理念同自己想做嘅事合適，所以報名。Candy自爆自己入行8年，性格更加屬於好勝，會唔會畀人覺得佢依然發緊明星夢？Candy無懼別人鬧佢發明星夢：「我覺得有一句說話，每一個人都會發夢，冇夢想同咸魚有咩分別呢？咁我只係同大家所發嘅夢唔同。」

到訪問最後一名參賽者，名叫張靜茵（Antia）25歲，職業係一名程式開發員，亦係一名網上Blogger。Antia更曾經參加過香港小姐：「我2016曾參選香港小姐，自己對幕前都好感興趣。」問到怕唔怕俾其他人叫佢做落選港姐呢？Anita指呢個唔係問題，又幾有自信喎！