因藏毒家暴外遇乜都衰過而自認係人渣嘅周永恒，沉寂好一陣子後，近日又再出現並透露自己就快做爸爸。周永恒同內地女友陳薇（Britni）於去年結婚，而有傳陳薇本身係周永恆嘅fans，相信亦都係因為咁自會接受甚至係包容周永恒嘅一切……

雖然已經有新家庭，但周永恒似乎都仲對同趙頌茹所生嘅兩個女有丁點關心，接受雜誌訪問時，聲淚俱下咁話好愛兩個女，但因為唔識點做、加上無勇氣，所以呢幾年一直都無見過兩個女，並自覺虧欠太多，又承諾會負起責任，分擔女兒的生活費，講到咁認真，都唔知信唔信佢好。另一邊廂，趙頌茹就話離婚四年幾，但只係收到過兩個月嘅生活費，不過就係訪問前夕，突然收到一個月嘅生活費，成件事都幾離奇。

對於周永恒嘅言論，網友一面倒負評，除指「騙徒手法層出不窮」外，又認為「連做人都唔識，點教仔女？」並有唔少人勸佢放過趙頌茹同兩個女，睇嚟人渣形象真係太深入民心啦。