方力申記憶力開始衰退 原因同小朋友有關？
撰文：賴家杰
出版：更新：
大忙人方力申（Alex）一直以工作行先，佢開辦嘅游泳學校更親力親為做埋教練一職，Alex透露做教練真係好辛苦：「我想同各位小朋友講，要愛惜教練，因為游水教練唔只係教一個人，又要經常浸喺泳池同埋日曬雨淋，同埋假日教練番朝九晚六，食飯只得15分鐘，所以其實會很累。」Alex坦言自己同其他教練食飯時間差不多。
方力申出席慈善晚宴。（梁碧玲攝）
教游水接觸小朋友之外，其次接觸最多就係小朋友家長，問到Alex有冇遇到怪獸家長？Alex笑言什麼類型都有：「佢哋會問我好多，譬如點先可以游得我咁好，我會唔會教導佢哋等，我自己都希望每一班都照顧到，我記憶力開始記唔到太多事，因為我要記好多學生名，所以我呢一段時間有兩百幾名學生，咁我暫時都記到幾十個嘅，其實都好開心㗎啦。」再問到有冇俾小朋友父母鬧？Alex笑言有，不過係鬧佢哋嘅小朋友而唔係佢。
Alex笑言依家大部份時間都用嚟教水。（梁碧玲攝）
做教育Alex直言與其他生意相當大分別：「就算蝕錢你都會覺得好有意義，因為睇到小朋友嚟游水好開心嘅樣，少學生嘅時候你會多時間同佢哋接觸，如果多人嘅時候咁代表生意好咗，呢個感覺好有趣。」問到感情生活方面，Alex完全唔擔心：「好多家長成日同我講，有事業愛情就會嚟，呢點係好嘅，所以我會努力繼續喺泳池浸。」
Alex開辦游泳學校後，覺得做教育係一件好有意義嘅事。（梁碧玲攝）