【再創世紀】周勵淇演天真無邪少女：我覺得已經係「摱車邊」㗎喇
無綫劇集《再創世紀》女主角之一的周勵淇 (Niki) ，在劇中由一名天真爛漫的少女演到成為金融界的女強人，卓定垚這個角色除了考她的演技，也挑戰她的逆齡生長絕技。劇迷同網民讚她演得好之餘，亦驚歎她恍如食了防腐劑一樣。現年39歲的Niki一向保養得宜，個樣完全唔似她的真實年齡，這次於該劇中飾演少女亦是零違和感。
到底Niki一副少女樣是怎樣點keep到的呢？Niki謙虛地表示：「我覺得我演呢個少女版已經係『摱車邊』㗎喇，再遲啲都演唔到，我仲特登剪咗齊蔭令自己個樣細個啲。至於你話點keep，真係要注意飲食同生活習慣，保持心情好都好重要。我好鍾意食嘢，不過咁啱係鍾意食啲健康嘅嘢，例如山藥、蘿蔔、淮山、蒟蒻同醋，唔鍾意食油膩嘢、糖、雪糕同西式甜品呢類嘢，係近年返得內地工作多，鍾意咗食辣嘢，但唔可以食太多。」
原來Niki更有研究養生之道，她說：「我有睇《黃帝內經》研究養生食療㗎，鍾意煲湯，會帶埋出街飲，例如煲土茯苓、扁豆衣，又會煲去濕茶。我喺內地拍戲時，每日都會自己煲湯煮飯食，所以我練得一手好廚藝㗎。每朝早餐我一定要食飯或者食粥，要有血氣，午餐可以正常食，夜晚7點後就戒食澱粉質。我已經戒咗飲凍嘢好多年，同埋會食好多supplement。」
Niki都有做運動的習慣，主要是想令身形線條Firm一些：「我日日都會拉筋，得閒就會去行山、跑步同埋做gym，一星期做兩、三次。」正所謂心理影響生理，所以Niki保養的秘訣也包括保持心情開朗：「我個人好樂天，做人要keep住有童真，諗嘢簡單啲。」至於護膚方面，天生皮膚極度敏感的Niki只會用最天然無添加的產品：「其實我好懶，不過一定會徹底清潔肌膚。」
《黃帝內經》是現存最早中醫理論著作，對後世中醫學理論的奠定有深遠的影響。當中有專門講解從中醫學角度出發的養生之道，並可以從食療方面入手，教大家保養、調養、培養、護養以及補養等，達至延年益壽之目的。
攝影：梁碧玲
髮型：Debby@Hair
化妝：Navi Lam
服裝：soeur from rue Madame
場地：FUMI