【大帥哥】張衛健都唔知幾時播:對我嚟講呢,幾時播都係一樣

撰文:林迅景
出版:更新:

《大帥哥》在開拍前原定會成為2018年TVB台慶劇之一,更加是張衛健(Dicky)強勢回歸TVB之作,相信大家都等到頸都長埋。怎知事前大事舖張的《大帥哥》播出日期一拖再拖,年頭等到年尾也沒有播映日期,差點變成倉底劇。正當所有人都以為《大帥哥》見光無期之際,洪永城(Tony)就在IG上率先爆料透露《大帥哥》將於2018年12月開播。

Tony昨日在Instagram話《大帥哥》會喺12月播。

今日Dicky出席「慈善跑」宣傳活動時,被問及:「知唔知Tony今日喺IG講《大帥哥》會12月播?」張衛健就笑著反問記者:「Tony?邊個Tony?梁朝偉吖?我問下佢先。」記者隨即解釋是指洪永城(Tony)。張衛健就回答說:「係咩?佢講就係㗎啦?我唔知吖,哈哈。(有冇求證?)我一陣問下Tony哥啦。」

張衛健好搞笑咁反問記者,邊個係Tony。(林迅景攝)

Dicky補充說:「其實對我嚟講呢,幾時播都係一樣。對我來講辛苦嘅拍攝當中,我好純粹係希望用廣東話,成套戲都係用廣東話去拍,俾一啲想聽我講廣東話嘅朋友去睇。始終我係土生土長,唔係淨係香港,我希望可以用一套戲俾少少歡樂大家。」

Dicky話自己終於有機會用廣東話拍戲,佢應該都一樣期待咗好耐。(林迅景攝)

張衛健自己已經有十多年未用過廣東話拍劇:「廣東話?哼哼,我諗離開TVB之後都仲有少量要用廣東話拍嘅劇,拍《小寶與康熙》嘅時候都係用廣東話,拍完《韋小寶》之後就算係一啲唔收音嘅戲我都有用廣東話,不過90%嘅對手都係用國語。」張衛健表示國語都是透過拍劇去學習的。TVB台慶臨近,張衛健就表示自己沒有被邀請:「我不知道,我每一年都不會(去),因為我不是那個(TVB藝員)。」

今年TVB頒獎典禮就應該見唔到《大帥哥》嘅張衛健,唯有等下年啦。(網上圖片)