【跳躍生命線】劉佩玥公開老公要求　親自教你點樣分周志文周志康

劉佩玥（Moon）與周志文的緋聞日前因為一次船河直播激咀而再被翻熱，雖然阿Moon早前已經澄清過與志文只是「好好朋友」關係，不過凡事無絕對，今日（13日）阿Moon就公開對未來老公的要求，而且親自教大家分辨孿生兄弟周志文和周志康。

大讚馬神扮嘢叻

無綫劇集《跳躍生命線》剛於周一（8/10）首播，觀眾看過後都一致好評，大讚追看性十足，尤以何廣沛的演技爆發成為焦點，更有網民直讚搶眼媲美馬德鐘！不過阿Moon亦不執輸，長腿女鐵騎的形象讓觀眾耳目一新，畫面中一舉一動都非常熟練，顯然事前下了不少苦功。不過阿Moon表示今次拍《跳》劇最大的難題，是要面對男神馬德鐘（馬神）。

「馬神除咗係一個好專業、好可敬嘅演員之外，佢仲好好笑。」劉佩再續說：「呢部劇最難嘅就係要我忍笑，佢好鐘意模仿其他演員，我覺得大家應該要邀請佢去扮吓其他人，佢會扮Ming Sir（劉兆銘），又扮我大笑同傻笑，我都成日同佢『示愛』，讚佢靚仔。」

阿Moon話周志文「百變」睇極唔厭

提到示愛這回事，仿佛在提醒記者阿Moon與周志文的緋聞。能夠惹來大家的誤會，絕非無中生有，雖然周志文與志康這對孿生兩兄弟出道已有十年之久，但若在街上同時遇見，或者只有忠粉才能秒分二人，而阿Moon亦是其中之一，她說：「我從來都無將佢哋認錯！」

很多人都說周志文、周志康超級似樣，阿Moon不以為然：「我真係唔覺得佢哋兩個似樣喎，即係我隻眼好，我嘅視力唔係咁好，但係我眼光好好！（二人最大分別是？）周志文未結婚、周志康結咗婚！其實佢哋面上有唔同癦喺唔同嘅地方，同埋隻眼係好唔同，阿康隻眼雙眼皮啲，阿文會有時雙眼皮同三眼皮，好百變，睇極都唔會厭！」

公開老公要求：阿文溫柔啲！

阿Moon除了眼力好，耳力都不弱，聽聲音就能分辨周志文、周志康：「阿文溫柔啲，阿康就活潑啲，（你喜歡哪種？）我兩樣都鐘意！咁如果我第時男友或老公，可以集合溫柔、活潑、再加啲成熟，同埋鄭子誠嘅韻味，我覺得會非常之好！」