【你咪理，我愛你】林盛斌同偶像拍床戲：絕對係成就上一個解鎖
撰文：鄺鈺瑩
出版：更新：
阿Bob話細細個已經睇蝦頭做舞台劇，今日可以同對方拍床上戲，絕對係成就上一個解鎖。（梁碧玲攝）
距離明年農曆新年尚有四個多月時間，但唔少賀歲片已經拍攝中，當中包括王祖藍首次執導嘅《你咪理，我愛你！》。一如以往賀歲片嘅慣例，《你咪理，我愛你！》搵嚟唔少藝人客串，而呢日客串嘅林盛斌（Bob）同蝦頭（楊詩敏）更賣大包玩到上床！
蝦頭難得如此性感，佢話已經做好防走光工作。（梁碧玲攝）
戲中飾演新婚夫婦嘅二人由於性生活方面出現問題，所以嘗試以不同方法得到滿足，雖然話係床戲，但話晒《你咪理，我愛你！》都係套闔家歡作品，所以呢埸床戲絕對唔會有埋身肉博鏡頭出現，之不過，見到蝦頭呢日以火紅超Deep V睡裙上陣，Bob即時笑言怕拍攝時頂唔順，所以事前食咗鎮定劑。「我怕自己之前通咗嘅血管會塞返或者爆。」而蝦頭亦都笑言因為太耐無床上活動，所以拍攝前要食靜心丸。
呢場戲係講Bob同蝦頭通過手同腳獲得高潮，工作人員完全準備咗隻假腳比蝦頭，但二人就嫌唔夠真實，於是出動私伙，最賤係導演王祖藍一嗌cut之後，Bob話要用火酒消毒自己。（梁碧玲攝）
Bob同蝦頭合作多次，所以拍床戲一啲都唔尷尬，Bob更表示拍攝前一晚，特意Whataspp蝦頭，告知十分期待。問到有否跟老婆備案，Bob就好淡定咁話:「佢完全唔知我今日做咩，到時佢入戲院就知。其實之前同蝦頭拍《大玩特玩》時都同過佢有一個親密接觸，今次唔喺水而喺床上面，昇華咗，嗰陣已經見過蝦頭完美體態，即係如果佢參加香港小姐的話，最完美體態獎一定有佢份，雖然冠亞季軍未必係佢……」
郭晉安見Bob同蝦頭玩得咁開心，忍唔住加入床戰。（梁碧玲攝）
Bob表示除《你咪理，我愛你！》之外，今日亦有拍另一賀歲片《如珠如寶》，日前拍攝跳海、撞車戲份時，更親身上陣，結果搞到手腳都有瘀，對於8月底才進行「通波仔手術」的他來說，是否太過博命，Bob就話:「我都係休息兩日就開工，都ok，呢段時間都飛來飛去，醫生有叫唔好咁粗勞，但工作要緊。」
Bob訪問時，自爆拍攝《巾幗梟雄III之諜血長天》時，曾經有場強姦胡杏兒的戲份，雖然拍攝時十分認真，但全廠工作人員一直喪笑，甚至胡杏兒都笑到收唔到，但可惜嘅係呢場戲最終被cut走晒。（梁碧玲攝）
點擊細圖，觀看阿Bob、蝦頭與郭晉安精彩的現場演出：
+47